महामारीका कारण राेकियाे विकिलिक्सका संस्थापक असान्जकाे सुनुवाइ
<p>लन्डन। विकिलिक्सका संस्थापक जुलियन असान्जलाई संयुक्तराज्य अमेरिका सुपुर्दगी गर्ने या नगर्ने भन्ने सुनुवाइ आगामी नोभेम्बरसम्म स्थगित गरिएको छ।</p>
<p>असान्जका वकीलहरूले कोभिड-१९ महामारीका बीच सुनुवाइ कार्य अघि बढाउनु 'स्वास्थ्यका कारण खतरा' रहेको दाबी गरेका थिए।</p>
<p>असान्जलाई स्वीडेन वा संयुक्तराज्य अमेरिकामा सुपुर्दगी गर्ने वा नगर्ने विषयमा आगामी १८ मे मा सुनुवाइ आरम्भ गर्ने योजना थियो।</p>
<p>स्वीडेनमा असान्जमाथि यौन दुर्व्यवहारको एउटा मुद्दा विचाराधीन छ भने संयुक्तराज्य अमेरिकाले असान्जमाथि जासुसीको आरोप लगाएको छ। अमेरिकामा असान्ज दोषी ठहरिए १७५ वर्षको जेलसजाय हुनेछ।</p>
<p>बेलायतका न्यायाधीश भानिसा बाराइजरका अनुसार छिटोमा आगामी २ नोभेम्बरदेखि मात्र असान्जमाथिको मुद्दाको सुनुवाइ हुनेछ। यो सुनुवाइ करीब तीन साताको हुनेछ।</p>
<p>असान्जलाई गत वर्ष अप्रिलमा लन्डनस्थित इक्वेडरको राजदूतावासबाट लन्डन प्रहरीले गिरफ्तार गरेको थियो। अमेरिकाले गिरफ्तार गर्ने र आफ्नो ज्यानको सुरक्षा नभएको भन्दै असान्जले उक्त दूतावासमा झण्डै आठ वर्षदेखि आश्रय लिएका थिए।</p>
<p>विकिलिक्सका संस्थापक असान्जले अमेरिकाविरुद्ध जासुसीको आरोप खण्डन गर्दै आएका छन्। <em>रासस–एएनआई</em></p>
प्रतिक्रिया दिनुहोस्
.jpg)
