कोभिड-१९ का बिरामीको उपचार प्लाज्मा थेरापीबाट
<p>कोलकाता। भारतको पश्‍चिमबंगाल राज्य सरकारले कोभिड-१९ का बिरामीको उपचारमा प्लाज्मा थेरापी अपनाउने निर्णय गरेको छ। </p>
<p>यसअघि भारतकै दिल्ली र कर्नाटक सरकारले सोही विधिबाट कोभिड-१९ का बिरामीको उपचार शुरु गरिसकेका छन्। सार्स, कोभिड, एच१एन१ र मर्सजस्ता भाइरस संक्रमणका बिरामीका लागि यो थेरापीको प्रयोग हुँदै आएको छ।</p>
<p>कोभिड-१९ का बिरामीमा पनि तिनै भाइरस संक्रमणको जस्तो लक्षण देखिँदै आएको छ। त्यसैले प्लाज्मा थेरापी कोभिड-१९ का बिरामी निको पार्न पनि उपयोगी हुने चिकित्सकहरूको विश्‍वास देखिन्छ। तर, त्यसको कुनै वैज्ञानिक आधार तयार भइसकेको छैन।</p>
<p>चिकित्सकहरूका अनुसार प्लाज्मा रगतमा पाइने एक किसिमको तरल पदार्थ हो, जसलाई रगतबाट छुट्याएपछि पहेँलो रंगको देखिन्छ। यसले शरीरमा आवश्‍यक प्रोटिन पुर्‍याउने काम गर्छ।</p>
<p>पश्‍चिमबंगाल सरकारले प्लाज्मा दान गर्न चाहने दाताको खोजी पनि शुरु गरेको छ। यस थेरापीको क्लिनिकल परीक्षण यसै साता शुरु गरिने राज्य सरकारको स्वास्थ्य विभागका अधिकारीहरूले जनाएका छन्।</p>
<p>‘त्यसका लागि इन्डियन काउन्सिल अफ मेडिकल रिसर्चले अनुमति दिइसकेको छ,’ स्वास्थ्य सचिव विवेक कुमारले बीबीसीसँग भने।</p>
<p>उनका अनुसार पहिलो चरणमा क्लिनिकल परीक्षणका लागि ८० जना बिरामीलाई सहभागी गराइने छ। दाताहरूबाट प्लाज्मा लिने काम सरकारी मेडिकल कलेज र अस्पतालहरूले गर्ने छन्। र, बिरामीको शरीरमा प्लाज्मा चढाउने काम संक्रामक रोगसम्बन्धी अस्पतालहरूमा हुनेछ। </p>
प्रतिक्रिया दिनुहोस्
.jpg)
