नेपाल वायु सेवा निगमको दक्षिण कोरिया चार्टर्ड उडान स्थगित
<p>काठमाडौं। १८ वैशाखमा दक्षिण कोरिया जाने तय भएको नेपाल वायु सेवा निगमको उडान तत्कालका लागि स्थगित भएको छ।</p>
<p>कोरियामा कार्यरत नेपाली कामदार लैजान दक्षिण कोरियाको राजधानी सोलका लागि निगमको उडान तय भएको थियो।</p>
<p>तर, अहिलेका लागि उडान स्थगित भएको सूचना आएको निगमकी प्रवक्ता अर्चना खड्काले बताइन्।</p>
<p>दक्षिण कोरिया लैजान लागिएका सबै कामदारको स्वास्थ्य परीक्षण गर्नुपर्ने हुँदा समय लाग्‍ने भएकाले अहिलेका लागि उडान स्थगित गरिदिन सूचना आएको खड्काले जानकारी दिइन्।</p>
<p>दक्षिण कोरियाबाट विदामा आएका दुई सय ८० जना नेपाली कामदार रोजगारी गन्तव्यमा फर्किन लागेका थिए।</p>
<p>१८ वैशाख बिहान साढे १० बजे त्रिभुवन अन्तर्राष्‍ट्रिय विमानस्थलबाट निगमको वाइडबडी विमान सोलका लागि उड्ने तालिका थियो ।</p>
<p>नेपाल आएका कामदारको विदा अवधि सकिएपछि गैरआवासीय नेपाली संघ कोरियाले उनीहरूलाई फर्काउने व्यवस्था मिलाएको थियो। विमानको भाडा कामदारले तिर्ने गरी उडानको व्यवस्था मिलाइएको थियो । उडानको अर्को मिति तय नभएको निगमले जनाएको छ।</p>
प्रतिक्रिया दिनुहोस्
.jpg)
