बारामा कोरोना भाइरस संक्रमित बसेकाे क्षेत्र ‘सिल’ गरियाे
<p>जनकपुर। प्रदेश २ मा आज थप तीनजनामा कोभिड-१९ पुष्टि भएपछि सो क्षेत्रमा उच्च सतर्कता बढाइएकाे छ।</p>
<p>बाराको जितपुरसिमरा-१९ र वडा नं. ७ मा बस्दै आएका काेराेना भाइरस संक्रमित दुई युवक बसेको क्षेत्रलाई सिल गरिएको सामाजिक विकास मन्त्रालयका सचिव डा. रामप्रसाद घिमिरेले आज पत्रकार सम्मेलनमार्फत् जानकारी गराएका हुन्।</p>
<p>अर्का संक्रमित वीरगञ्ज–२ का हुन्। १४ वैशाखमा वीरगञ्जका दुईजनामा कोरोना पुष्टि भएपछि उनीहरूको ‘कन्ट्याक्ट ट्रेसिङ’को आधारमा तीनैजनाको खोजबिन गरी क्वारेन्टाइनमा राखिएको थियो।</p>
<p>तीनैजनालाई वीरगञ्जस्थित नारायणी अस्पतालमा उपचार भइरहेको छ।</p>
<p>प्रदेश २ मा अहिलेसम्म दुई हजार २१८ को स्वाबको नमूना सङ्कलन गरिएकामा एक हजार ३५० को रिपोर्ट नेगेटिभ आएको छ भने ८५६ को रिपोर्ट आउन बाँकी छ।</p>
<p>यस प्रदेशमा १० जना कोरोना संक्रमितमध्ये चारजना निकाे भएर घर फर्किसकेका छन् भने ६ जनाको उपचार भइरहेको छ।</p>
<p>अहिलेसम्म चार हजार ९१४ को आरडीटी गरिएको छ। यस प्रदेशमा एक हजार ४४३ क्वारेन्टाइनमा, चार हजार १७ जना होम क्वारेन्टाइनमा र १३ जना आइसोलेसनमा छन्। <em>रासस</em></p>
प्रतिक्रिया दिनुहोस्
.jpg)
