एडीबीद्वारा स्वास्थ्य सामग्री र सहुलियतपूर्ण ऋण बजेट सहयोग
<p>काठमाडाैं। एशियाली विकास बैंक(एडीबी)ले तीन लाख अमेरिकी डलर बराबरका स्वास्थ्य सामग्री र २५० मिलियन अमेरिकी डलर बराबरको सहुलियतपूर्ण ऋण बजेट सहायता उपलब्ध गराउने भएको छ।</p>
<p>अर्थमन्त्री डा. युवराज खतिवडा र एशियाली विकास बैंकका अध्यक्ष मासाचुगु आसाकावाबीच कोभिड-१९ का कारण परेको असर र त्यसमा बैंकले गर्न सक्ने सहयोगबारे आज भएको टेलिफोन वार्तामा बैंकले त्यस्तो जानकारी दिएको हो।</p>
<p>वार्तामा अर्थमन्त्री र बैंकका अध्यक्षबीच कोभिड-१९ ले अर्थतन्त्रमा पार्ने प्रभाव, एशियाली विकास बैंकले नेपाललाई गरिरहेको सहयोग र आगामी दिनमा नेपालको विकासका प्राथमिकताका क्षेत्रमा बैंकले गर्न सक्ने थप सहयोगका विषयमा छलफल भएको थियो।</p>
<p>अर्थमन्त्रीले कोभिड-१९ को रोकथाम तथा नियन्त्रणका लागि नेपालले लिएको रणनीतिबाट ठूलो संक्रमण हुन नपाएको जानकारी गराएकाे अर्थ मन्त्रालयले जनाएको छ।</p>
<p>मन्त्री खतिवडाले एशियाली विकास बैंक नेपालको मुख्य विकास साझेदार रहेको बताउँदै बैंकले ऊर्जा, यातायात, खानेपानी र शहरी विकासलगायत ग्रामीण उद्यम क्षेत्रमा गरेको सहयोगको प्रशंसा गरे। साथै उनले कोभिड–१९ बाट स्वास्थ्य सेवामा सार्वजनिक क्षेत्रको भूमिका प्रभावकारी रहनुपर्ने तथ्य उजागर भएको बताउँदै आगामी दिनमा नेपालको स्वास्थ्य पूर्वाधार विकासमा बैंकको थप सहयोगको अपेक्षा गरे।</p>
<p>अध्यक्ष आसाकावाले कोभिड-१९ को नियन्त्रणमा नेपालले चालेका कदमहरूको प्रंशसा गर्दै कोभिड-१९ का कारण सिर्जना भएको चुनौतीपूर्ण वर्तमान परिस्थितिलाई सम्बोधन गर्नका लागि बैंकले नेपाललाई सहुलियतपूर्ण ऋण एवम् निजी क्षेत्रका लागि उपलब्ध स्रोतसाधन समेतका माध्यमबाट सहयोग गर्ने प्रतिबद्धता जनाए। </p>
<p>उनले नेपालको आर्थिक सामाजिक क्षेत्रको विकासका लागि बैंकले सहयोगलाई बढोत्तरी गर्दै जाने बताउँदै आगामी दिनमा बैंकले ऊर्जा, यातायात, नागरिक उड्डयन, सङ्घीयतामा सेवाप्रवाहजस्ता क्षेत्रमा थप लगानी गर्ने बारेमा पनि जानकारी गराए। <em>रासस</em></p>
प्रतिक्रिया दिनुहोस्
.jpg)
