एक महीनादेखि धार्चुलामा क्वारेन्टाइनमा रहेका नेपालीलाई आज स्वदेश फर्काइँदै
<p>धनगढी। गत १३ चैतदेखि भारत पिथौरागढ जिल्लाको धार्चुला क्‍वारेन्टाइनमा रहेका नेपाली नागरिकहरूको आज उद्दार गरिने भएको छ।</p>
<p>एक महिनाभन्दा बढी भारतको क्‍वारेन्टाइनमा बिताएका उनीहरूको उद्धार हुन सकेको थिएन। उनीहरूलाई ल्याउने विषयमा बुधबार अपरान्ह बसेको बैठकले बिहीबार बिहान उद्धार गर्ने निर्णय गरेपछि उद्दार हुने भएको हो। बुधबार नेपालतर्फका बैतडी र दार्चुला तथा भारतको पिथौरागढका प्रमुख जिल्ला अधिकारीबीच भएको सहमतिपछि आज उद्धारको तयारी गरिएको हो।</p>
<p>सीमामा रोकिएका नेपाली ल्याउने विषयमा पटक-पटक छलफल गरिएको भए पनि कहिले नेपाल ल्याउने भन्ने विषयमा टुंगो लागेको थिएन। </p>
<p>उनीहरूलाई आज बिहान ७ बजेदेखि उद्धार गरिने भनिए पनि केही समय लाग्ने प्रमुख जिल्ला अधिकारी यदुनाथ पौडेलले जानकारी दिए। उनले अबको केहीबेरमै उद्दार शुरु गरिने बताए। </p>
<p>उनीहरूलाई दुईवटा नाकाबाट ल्याइने प्रजिअ पौडेलले जानकारी दिए। उनका अनुसार बैतडी र बझाङका बासिन्दालाई दत्तु नाकाबाट प्रवेश गराइने छ। दार्चुलालगायत अन्य जिल्लाका बासिन्दालाई खलंगा नाका भएर प्रवेश गराइने बताए।</p>
<p>धार्चुलाका पाँचवटा क्‍वारेन्टाइनमा एक हजारभन्दा बढी नेपाली एक महिनादेखि बसिरहेका छन्। उनीहरूलाई नेपाल ल्याउनकै लागि बैतडी र बझाङका जनप्रतिनिधि तीन दिनदेखि दार्चुलामै छन्।</p>
<p><strong>यो पनि पढ्नुहोस्</strong><br />
<a href="https://dekhapadhi.com/news/11605" target="_blank">पिथौरागढ र धार्चुलामा अलपत्र नेपालीलाई स्वदेश भित्र्याउन थालियो</a></p>
प्रतिक्रिया दिनुहोस्
.jpg)
