नारदमुनि भन्छन्- 'सुदूरपश्चिमका १८ सांसद केपी ओलीको पक्षमा'
<p>कैलाली। कैलालीबाट निर्वाचित प्रतिनिधिसभा सदस्य नारदमुनि रानाले सुदूरपश्‍चिमबाट संघीय संसदमा प्रतिनिधित्व गर्ने १८ जना सांसद प्रधानमन्त्री केपी शर्मा ओलीको पक्षमा रहेको बताएका छन्।</p>
<p>सत्तारुढ नेपाल कम्युनिष्‍ट पार्टी (नेकपा)भित्र शक्तिसंघर्ष तीव्र बनेपछि अध्यक्ष ओली र अर्का अध्यक्ष पुष्‍पकमल दाहाल पक्षधरले सांसदहरुको हस्ताक्षर अभियान चलाइरहेका बेला उनले यस्तो दाबी गरेका हुन्।</p>
<p>सुदूरपश्‍चिमबाट प्रतिनिधिसभामा १९ र राष्‍ट्रिय सभामा सात जना नेकपाका सांसद छन्। तीमध्ये १४ जना प्रतिनिधिसभा सदस्य र चारजना राष्‍ट्रियसभा सदस्य ओलीको पक्षमा उभिएका रानाले देखापढीलाई बताए। </p>
<p>दाहालका निकट मानिने लेखराज भट्टदेखि नेकपाका उपाध्यक्ष वामदेव गौतमनिकट मानिने बझाङका भैरवबहादुर सिंह, बाजुराका लालबहादुर थापा र दार्चुलाका गणेश ठगुन्‍ना ओलीको पक्षमा देखिएका छन्। </p>
<p>डोटीका प्रेम आले, बैतडीका दामोदर भण्डारी, कञ्‍चनपुरका नरबहादुर धामी, निरु पाल, बिनादेवी बुढाथोकी, कैलालीका नारदमुनि राना, गौरीशंकर थारू, लक्ष्‍मी चौधरी, डडेल्धुराकी निरादेवी जैरू, बझाङकी आशा बिकले पनि प्रधानमन्त्री ओलीलाई समर्थन गरेको दाबी उनी पक्षधरको छ। </p>
<p>नेकपाका सुदूरपश्‍चिम इञ्‍चार्ज भीम रावल, कैलालीबाट निर्वाचित झपट रावल, अछामका यज्ञ बोगटी र कञ्‍चनपुरबाट निर्वाचित दाहालकी बुहारी बिना मगर मात्र ओलीइतर समूहमा रहेको बताइन्छ। कञ्‍चनपुरका दीपकप्रकाश भट्ट भने कतै खुलेका छैनन्। </p>
<p>त्यस्तै, राष्‍ट्रियसभाका चक्र स्‍नेही, महेश महरा, इन्दु कडरिया र शारदा भट्ट आफ्नो पक्षमा रहेको दाबी ओली पक्षको छ।</p>
प्रतिक्रिया दिनुहोस्
.jpg)
