आज दिउँसोसम्म बैतडी र दार्चुला भएर १९८० नेपाली स्वदेश भित्रिए
<p>कैलाली। गएको १३ चैतदेखि भारतको पिथौरागढस्थित् धार्चुला र झुलाघाटका क्वारेन्टाइनमा रहेका नेपाली मजदुरको बिहानैदेखि उद्धार भइरहेको छ।</p>
<p>क्वारेन्टाइन अवधि सकिए पनि नेपाल प्रवेशको अनुमति नपाउँदा समस्यामा परेका उनीहरूको आज बिहानैदेखि उद्धार भइरहेको हो।</p>
<p>दिउँसो साढे ३ बजेसम्म दार्चुलाका दुई वटा नाका भएर एक हजार २५३ जना दार्चुला भित्रिएका छन्।</p>
<p>जसमा बैतडी, बझाङका नागरिकलाई दत्तु नाका भएर प्रवेश गराइएको छ। त्यहाँबाट अहिलेसम्म ८७७ जना नेपाल भित्रिसकेका छन्।</p>
<p>दार्चुला लगायत अन्य जिल्लाकालाई खलंगा नाका भएर प्रवेश दिइएको दार्चुलाका प्रमुख जिल्ला अधिकारी यदुनाथ पौडेलले बताए। उनले अहिलेसम्म खलंगा नाका भएर ३७६ जना भित्रिएको बताए।</p>
<p>साँझ ६ बजे सम्म उद्धार जारी रहने जनाइएको छ। क्वारेन्टाइनमा राखिएकाहरूको उद्धार शुरू भएपछि भारतमा रहेका अन्य नेपाली पनि आज फर्किन थालेका छन्।</p>
<p>धार्चुला र आसपासको क्षेत्रमा काम गर्दै आएका नेपालीहरू धमाधम फर्किन थालेका हुन्।</p>
<p>त्यस्तै, बैतडीको झुलाघाट नाका भएर अहिलेसम्म ७२७ जना नेपाल भित्रिसकेको बैतडीका प्रमुख जिल्ला अधिकारी आनन्द पौडेलले बताए।</p>
<p>उनले अझै पनि मानिस आउनेक्रम जारी रहेको बताउँदै उद्धारपछि उनीहरूलाई सम्बन्धित् स्थानीय तहमा पठाउन शुरू गरिएको बताए।</p>
<p>उद्धार गरिएका सबैलाई सम्बन्धित् स्थानीय तहका क्वारेन्टाइनमा राख्ने गरी पठाउने सहमति भएको स्थानीय प्रशासनले जनाएको छ।</p>
प्रतिक्रिया दिनुहोस्
.jpg)
