लकडाउनले नछेकेको ‘स्वास्थ्यका लागि खेलकुद’
<p>काठमाडौं। ‘स्वास्थ्यका लागि खेलकुद, राष्‍ट्रका लागि खेलकुद’- राष्‍ट्रिय खेलकूद परिषद्ले दिएको नारा हो यो । तर कोभिड-१९ को महामारी फैलिएसँगै ‘राष्‍ट्रको लागि खेलकुद’ ठप्प छ । ‘स्वास्थ्यको लागि खेलकुद’ले भने निरन्तरता पाइरहेको छ।</p>
<p>खेल क्षेत्रमा औपचारिक रुपले समर्पित खेलाडी र प्रशिक्षकमात्र होइन लकडाउनको समयमा घरमै व्यायाम गर्नेको संख्या बढ्दो छ । खेलाडी र प्रशिक्षक यो अभ्यासमा छुट्ने कुरै भएन । लकडाउनका कारण नियमित दैनिकीमा परिवर्तन आए पनि उनीहरुको शारीरिक अभ्यासमा भने कुनै फेरबदल आएको छैन ।</p>
<p>फुटबल विज्ञ तथा अखिल नेपाल फुटबल संघ (एन्फा) लिग कमिटीका निर्देशक सञ्‍जिव मिश्रको दैनिकी लकडाउन पहिले ‘मर्निङ वाक’बाट शुरू हुन्थ्यो। लकडाउनका कारण घरबाहिर मर्निङ वाक रोकिए पनि उनले रोकेका छैनन् । अचेल घरकै छतमा दौडिने र व्यायाम गर्ने गर्छन् उनी । नेपाल सरकारले दिएको ‘स्वास्थ्यका लागि खेलकुद, राष्‍ट्रका लागि खेलकुद’ भन्ने नारा अहिले सार्थक भएको मिश्र बताउँछन्। </p>
<p>“मानव स्वास्थ्यका लागि खेलकुदको एकदमै ठूलो महत्व छ। यसमा उमेरको कुनै हदबन्दी हुदैन। बालकदेखि वृद्ध सबैका लागि खेलकुद आवश्यक छ । सबै खेलकुद गतिविधि ठप्प भएको यो बेलामा पनि स्वास्थ्यका लागि खेलकुद भने जारी छ। अहिले खेलकुदको महत्व सबैले महशुस गरेका छन्,” घरमै दैनिक रुपमा बिहानपख दुई घण्टा अभ्यास गरिरहेका मिश्र भन्छन् । </p>
<p>१३औं राष्‍ट्रिय खेलकुद प्रतियोगितामा नेपाललाई दुई स्वर्ण पदक जिताउन सफल मण्डेकाजी श्रेष्‍ठको पनि खेलकुद गतिविधि बन्द भए पनि नियमित अभ्यास रोकिएको छैन । </p>
<p>“सामाजिक दुरी कायम गर्ने भनेर लकडाउन गरिएको छ। सबैजना घरमा बस्नु परेको छ। यसरी बस्दा कोरोना भाइरस संक्रमणबाट जोगिन सके पनि अन्य रोगले च्याप्न सक्ने हुन्छ,” पछिल्लो समय लकडाउनको मारमा परेकालाई सहयोग गर्न सक्रिय श्रेष्‍ठ भन्छन्, “त्यसैले घरकै कम्पाउण्ड वा छतमा दौडने जस्ता अभ्यास गरिरहेको छु। घरमै बसे पनि स्वास्थ्यका लागि पनि केही न केही गतिविधि त गर्नैपर्छ ।”</p>
<p>राष्‍ट्रिय खेलकुद परिषद्मा जीवनराम श्रेष्‍ठ सदस्यसचिव हुँदा भिजन २०२० परियोजना अन्तर्गत २०६४ मा ‘राष्‍ट्रिय गौरव तथा स्वास्थ्यका लागि खेलकुद’ भन्ने नारा ल्याइएको थियो। खेलाडी, प्रशिक्षक, प्रायोजक, कर्मचारीलगायत सरोकारवाला सबैसँगको व्यापक छलफलमा उक्त नारा ल्याइएको थियो। उक्त नारा परिवर्तन हुदै ‘विकास, अनुशासन र गतिशीलताका लागि खेलकुद’ बन्यो । युवराज लामा सदस्यसचिव भएपछि उक्त नारामा पुनः परिमार्जन गरी ‘स्वास्थ्यको लागि खेलकुद, राष्‍ट्रका लागि खेलकुद’ बनाइएको थियो। </p>
<p>“पुरानो नाराले सबैलाई समेट्न सकेको थिएन त्यसैले यो नारा दिएका हौं”, लामा भन्छन्, “खेलकुदको चुरो नै स्वास्थ्य हो । हरेकले पहिला स्वास्थ्य र त्यसपछि मात्र राष्‍ट्रका लागि खेल्ने हो ।”</p>
<p>पूर्व सदस्यसचिव लामा अहिले निजगढमा छन्। त्यहाँ पनि उनले बिहानको नियमित व्यायाम छुटाएका छैनन्। भन्छन््, “नियमित अभ्यास त गरिरहेकै छु। आफ्नो स्वास्थ्यका लागि पनि नियमित व्यायाम त गर्नै पर्यो।”</p>
<p style="text-align:center"><img alt="" height="249" src="https://www.dekhapadhi.com/storage/photos/shares/Sports/Ways-to-keep-well-during-coronavirus-lockdown-Nepali Times-8.jpg" width="850" /></p>
<p>प्रतिस्पर्धात्मक खेल खेल्न नपाए पनि खेलाडीहरू आराम गरेर भने बसेका छैनन् ।। नेपाली राष्‍ट्रिय क्रिकेट टीमका बलर सोमपाल कामीले घरको छतमा व्यायाम गरेको भिडिओ निरन्तर सामाजिक सञ्‍जालमा पोष्‍ट गरिरहेका हुन्छन्। त्यस्तै नियमित रूपमा व्यायामको भिडिओ पोष्‍ट गर्ने अर्का खेलाडी हुन्, अनिल गुरूङ। राष्‍ट्रिय फुटबल टीमका पूर्व कप्तान अनिलले कहिले घरको कौसीमा त कहिले आँगनमा ‘एक्सरसाइज’ गरेको भिडिओ पोष्‍ट गरिरहेका हुन्छन्। </p>
<p>‘च्यासल युथ क्लब’का मिडफिल्डर अमिर श्रेष्‍ठ र ‘त्रिभुवन आर्मी क्लब’का रक्षक विकास खवासले पनि घर नजिकको मैदानमा एक्लै अभ्यास गरेको भिडिओ नियमित पोस्ट गरिरहेका हुन्छन् । त्रिभुवन आर्मी क्लबका गोलकिपर विकेश कुथु, संकटा क्लबका सुवास गुरूङ, महिला राष्‍ट्रिय टीमकी कप्तान रुविना क्षेत्रीलगायतका खेलाडीले लकडाउनको समयमा घरमै नियमित व्यायाम गरिरहेका छन्। </p>
<p>खेलाडीलाई फिट रहन आवश्यक सल्लाह सुझाव दिने तथा मैदानमा खट्ने फिजियो ट्रेनर बिक्रम न्यौपानेले घरमै बसेर खेलाडी तथा सर्वसाधारणका लागि व्यायाम टिप्स दिँदै आएका छन्। उनले पनि घरमै नियमित रूपमा व्यायाम गरिरहेका छन्। बिक्रमसँगै मधुमेहका बिरामी रहेका उनका बुवाले पनि नियमित व्यायाम गरिरहेका छन् । </p>
<p>हाल ओलम्पिक कमिटीका अध्यक्ष रहेका जीवनराम श्रेष्‍ठको लकडाउन दैनिकीमा टेबलटेनिस थपिएको छ। उनी बेलुका टेबलटेनिस खेल्न थालेका छन्। </p>
<p>“बिहान बिहान हल्का एक्सरसाइज त पहिले पनि हुन्थ्यो। अहिले अलि बढी फुर्सद मिलेको छ। अलि धेरै समय एक्सरसाइज गर्छु। आजभोलि चाहिँ बेलुकी टेबलटेनिस पनि खेल्छु,” श्रेष्‍ठ भन्छन् ।</p>
<p>कोभिड-१९ महामारी विश्वव्यापी रूपमा फैलिँदा नेपाली खेलकुदको नारामा उल्लेख भए जस्तो राष्‍ट्रका लागि खेलकुद नभए पनि स्वास्थ्यको लागि खेलकुद भने कायमै रहेको फुटबल विज्ञ मिश्र ठान्छन् । </p>
<p>“गाउँघरतिर विभिन्न बहानामा शारीरिक व्यायाम भइरहेको हुन्छ। तर शहरी जीवन निकै व्यस्त हुने हुँदा कसरत कम हुन्छ । त्यसैले कतिपय मानिसहरु जिम जाने गर्थे । अहिले त्यो पनि रोकिएको छ । त्यसकारण घरमै व्यायाम गर्ने क्रम बढेको छ”, मिश्र भन्छन् ।</p>
प्रतिक्रिया दिनुहोस्
.jpg)
