श्रमिक दिवसमा दाहालको सन्देश- कोभिड-१९ बाट सजग बनौं
<p>काठमाडौं। नेपाल कम्युनिष्‍ट पार्टी (नेकपा) का अध्यक्ष पुष्‍पकमल दाहालले १३१औं अन्तर्राष्‍ट्रिय श्रमिक दिवसका अवसरमा शुभकामना सन्देश दिँदै कोरोना भाइरसको संक्रमणबाट बच्न सावधानी र चेतना अभिवृद्धि गर्न श्रमजीवि वर्गलाई आग्रह गरेका छन्।</p>
<p>“कोभिड-१९ को विश्‍वव्यापी महामारीको सामना गर्न सिंगो विश्‍व नै संघर्षरत छ, यतिबेला संसारभरका श्रमजीवी मजदुरहरूको रोजगारी गुमिरहेको छ,” सन्देशमा भनिएको छ, “दैनिक ज्याला गरेर जीविकोपार्जन गर्नुपर्ने राजधानीलगायत विभिन्‍न शहरमा रहेका निम्‍न वर्गीय श्रमजीवी जनताको खाद्यान्‍नलगायतको व्यवस्थापनमा आवश्‍यक राहत र विशेष सहयोगको प्याकेज निर्माण गर्न म सरकारको विशेष ध्यानाकर्षण गराउँछु।”</p>
<p>१ मे १८८६ मा अमेरिकाको सिकागोमा आठघण्टे कार्यदिनका लागि गरिएको आन्दोलनको स्मरणस्वरूप १ मेमा विश्‍वभर अन्तर्राष्‍ट्रिय मजदुर दिवस मनाइन्छ।</p>
<p>नेपालमा विसं २००३ मा विराटनगर जुट मिलबाट शुरु भएको श्रमिक आन्दोलन, विभिन्‍न कालखण्डका सशस्त्र र शान्तिपूर्ण जनआन्दोलनमा श्रमजीवी जनताको बलिदानीपूर्ण संघर्षलाई पनि दाहालले आफ्नो सन्देशमा स्मरण गरेका छन्।</p>
प्रतिक्रिया दिनुहोस्
.jpg)
