कोभिड-१९ परीक्षण किट र पीपीई पठाइदिन प्रदेश १ का जिल्ला अस्पतालका मेसुहरूको माग
<p>विराटनगर। प्रदेश १ का जिल्ला अस्पतालका मेडिकल सुपरिटेण्डेन्ट कोभिड-१९ को रोकथाम तथा उपचारमा प्रयोग हुने अत्यावश्यक सामग्रीको माग गरेका छन्।</p>
<p>सामाजिक विकास मन्त्री जीवन घिमिरेसँगको संयुक्त भिडिओ कन्फ्रेन्समा १४ जिल्लामध्ये अधिकांसले व्यक्तिगत सुरक्षा उपकरण (पीपीई) नहुँदा काम गर्न समस्या भएको गुनासो गरे।</p>
<p>मन्त्री घिमिरेले अस्पतालमा अहिले रहेको जनशक्ति तथा प्रविधिको बारेमा जानकारी लिएका छन्।</p>
<p>उनले महामारीको यो बेला कोभिड-१९ परीक्षण तथा स्वास्थ्यकर्मीले सुरक्षाको लागि प्रयोग गर्ने सामग्रीको विश्व बजारमै अभावका बीच ती सामान उपलब्ध गराउनेप्रति प्रदेश सरकार प्रयत्‍त गरिरहेको बताएका छन्।</p>
<p>"स्वास्थ्यकर्मीलगायत जनशक्ति अभाव पूर्तिबारे पनि हामी योजना बनाउँदैछौं। तपाईंहरू ढुक्क भएर काम गर्नुहोस्। केही समस्या भए निर्धक्क भन्‍नुहोस्", अस्पतालका मेसुहरूसँग मन्त्री घिमिरेको भनाइ उद्धृत गर्दै सचिवालयले जनाएको छ।</p>
<p>सबैभन्दा बढी प्रदेश १ मा ३१ जना कोभिड-१९ का बिरामी भेटिएका छन्। तीमध्ये उदयपुरमा २८, झापामा २ र भोजपुरमा १ जना फेला परेका हुन्।</p>
<p>उनीहरूको विराटनगरस्थित कोशी अस्पतालमा उपचार भइरहेको छ।</p>
प्रतिक्रिया दिनुहोस्
.jpg)
