संसारलाई सतर्क रहन पर्याप्त समय दिएका थियौंः डब्लूएचओ
<p>जेनेभा । विश्‍व स्वास्थ्य संगठन (डब्लूएचओ)का महानिर्देशक डा. टेड्रस अदानम गिब्रेयससले कोभिड-१९ महामारीबाट सतर्क रहन आफूहरूले संसारलाई पर्याप्त समय दिएको बताएका छन् ।</p>
<p>‘ग्लोबल हेल्थ इमर्जेन्सी’ घोषणा गर्न डब्लूएचओले ढिलाइ गरेको आरोप उनले अस्वीकार गरे ।</p>
<p>डा. टेड्रसले अनलाइन मिडिया ब्रिफिङमा डब्लूएचओले ३० जनवरीमा गरेको घोषणा उपयुक्त समयमा भएको बताए । ‘त्यतिबेला चीनभन्दा बाहिर कोरोना भाइरस संक्रमणका ८२ वटा मात्र केस थिए,’ उनले भने, ‘र, तीमध्ये एकजनाको पनि मृत्यु भएको थिएन ।’</p>
<p>सोही मिडिया ब्रिफिङमा डब्लूएचओ इमर्जेन्सी विभाग प्रमुख माइक रायनले सोमालिया, हैटी, सुडान, दक्षिण सुडान, यमन, सिरिया, अफगानिस्तान, सियरा लियोन, उत्तरी नाइजेरियाजस्ता कमजोर आर्थिक अवस्थाका मुलुकमा कोभिड-१९ को महामारी चिन्ताजनक रूपमा बढ्दै गएको बताए ।</p>
<p>कोरोना भाइरस चीनको प्रयोगशालामा उब्जाइएको अमेरिकी राष्‍ट्रपति डोनाल्ड ट्रम्पको दाबी सही नभएको उनले प्रष्‍ट्याए । ‘यो भाइरस प्राकृतिक रूपबाट उत्पन्न भएको हो, कुनै प्रयोगशालामा बनाइएको होइन,’ उनले भने ।</p>
प्रतिक्रिया दिनुहोस्
.jpg)
