अफगानिस्तानमा ‘स्वास्थ्य विपत्ति’: अमेरिकी वाचडग
<p>वासिङ्टन। अफगानिस्तानले कोभिड-१९ का कारण ‘स्वास्थ्य विपत्ति’को सामना गर्नुपर्ने चेतावनी दिइएको छ।</p>
<p>समाचार एजेन्सी रोयटर्सका अनुसार कमजोर स्वास्थ्य सेवा प्रणाली, कुपोषण, युद्धलगायत जोखिमपूर्ण अवस्थाका कारण अफगानिस्तानको अवस्था भयावह बन्ने चेतावनी अमेरिकी संसद् कंग्रेसलाई बुझाइएको रिपोर्टमार्फत दिइएको हो।</p>
<p>स्पेसल इन्स्पेक्टर जनरल फर अफगानिस्तान रिकन्स्ट्रक्सन (सिगार) जोन सोप्कोले बुझाएको उक्त रिपोर्टमा महामारीले अमेरिकी नेतृत्वमा चलिरहेको शान्ति प्रक्रिया नै अवरुद्ध हुन सक्ने कुरामा सचेत गराइएको छ।</p>
<p>अहिले नै कोभिड-१९ को महामारीले अफगानिस्तान प्रभावित भइसकेको उल्लेख गर्दै रिपोर्टमा शान्ति प्रक्रिया अवरुद्ध भयो भने सीमा बन्द हुने तथा व्यापारिक र मानवीय सेवामा समस्या आउने कुरामा रिपोर्टमा सचेत गराइएको छ।</p>
<p>१० मार्चदेखि शुरु भएको शान्ति प्रक्रियाको सफलताका लागि अमेरिकाले तालिबान र अफगानिस्तानका राष्‍ट्रपति असरफ घानीमाथि जोखिममा रहेका हजारौं लडाकुलाई जेलमुक्त गरिदिन दबाब सिर्जना गरेको छ।</p>
<p>अफगानिस्तानमा करिब दुई हजार दुई सय जनामा कोभिड-१९ पोजिटिभ देखिइसकेको छ। र, ६४ जनाको मृत्यु भइसकेको छ।</p>
प्रतिक्रिया दिनुहोस्
.jpg)
