तीन सातापछि सार्वजनिक भए किम जोङ-उन
<p>सोल। गम्भीर स्वास्थ्य अवस्थाबारे तीन साता लामो अफवाहपछि उत्तर कोरियाली नेता किम जोङ-उन हिजो एक फ्याक्ट्रीले निरीक्षण गर्दै सार्वजनिक जीवनमा फर्किएका छन्। </p>
<p>मुटुको शल्यक्रियापछि सार्वजनिक जीवनबाट टाढिएका उनको स्वास्थ्य गम्भीर रहेको अडकलबाजीहरू सार्वजनिक भएका थिए।</p>
<p>तर, हिजो सुन्चोन शहरस्थित एक उद्योगद्वारा आयोजित समारोहमा उनी देखिए। र, आफू स्वस्थ रहेको देखाए। सरकारी समाचार एजेन्सीमार्फत उनी उक्त समारोहमा उपस्थित भएका तस्वीर सार्वजनिक गरिएको हो।</p>
<p>३६ वर्षीय नेता किम यसअघि ११ अप्रिलमा मात्र सार्वजनिक रूपमा देखिएका थिए। त्यसयता आफ्ना हजुरबुवा किम इल सुङको जन्म जयन्ती समारोहमा समेत उनी अनुपस्थित रहेका थिए।</p>
<p>उनी मुटुको गम्भीर समस्यामा रहेको या कोरोना भाइरसको संक्रमणमा परेर क्वारेन्टाइनमा बसेकोलगायत अनुमान सार्वजनिक हुँदै आएका थिए। चीनले उनलाई बचाउन चिकित्सकहरू पठाएको अनुमान पनि विदेशी सञ्चारमाध्यमहरूले गरेका थिए।</p>
<p>हिजो उनी हँसमुख र तन्दुरुस्त अवस्थामा देखिएका छन्। रिबन काटिरहेका र मल उत्पादन गर्ने फ्याक्ट्रीको निरीक्षणका क्रममा अधिकारीहरूसँग हँसिलो अनुहारमा कुराकानी गरिरहेको अवस्थामा देखिएका छन्।</p>
प्रतिक्रिया दिनुहोस्
.jpg)
