स्विडेनमा खुल्दैछ सेल्फ आइसोलेसन रेस्टुराँ
<p>स्टकहोम। स्विडेनको भर्मल्यान्डमा १० मेदेखि यस्तो रेस्टुराँ खुल्दैछ, जो संसारकै सानो रेस्टुराँ हुने सञ्‍चालकको दाबी छ।</p>
<p>‘टेबल फर वान’ नाम दिएर पप-अप रेस्टुराँ खुलन लागेको हो। यस रेस्टुराँमा एक दिनमा एक ग्राहकले मात्र सेवा पाउने छन्।</p>
<p>रेसमस पर्सन र लिन्डा कार्लसन दम्पती यस फरक अवधारणाका हिमायती हुन्। उनीहरूले रेस्टुराँ खोल्न लागेको स्थान स्टकहोमबाट करिब तीन सय ५० किलोमिटर टाढा पर्छ।</p>
<p>रेस्टुराँमा एउटा मात्र टेबल र कुर्सी हुने छन्। रेस्टुराँ रसिलो घाँसे मैदानमा खुल्दैछ।</p>
<p>संसारभर कोभिड-१९ को महामारी फैलिइरहँदा सेल्फ आइसोलेसनको लहर नै चलेको छ। यही लहरलाई पछ्याउन खोजेका हुन्, रेसमस र लिन्डाले।</p>
<p>ग्राहकले दिनभर अर्को व्यक्तिसँग भेट्न र कुराकानी गर्न पाउने छैनन्। र, ‘सेल्फ आइसोलेसन’को आनन्द उठाउन पाउने छन्।</p>
<p>रेस्टुराँमा दायाँ-बायाँ वेटर र या रेस्टुराँका स्टाफ हुने छैनन्। न त अर्को टेबलमा अन्य पाहुना नै हुनेछन्। </p>
<p>आफूहरूले पैसा कमाउने उद्देश्यले यस नयाँ अवधारणामा काम नगरेको रेसमस र लिन्डा बताउँछन्।</p>
प्रतिक्रिया दिनुहोस्
.jpg)
