दमौली अस्पतालमा स्वाब संकलन बुथ सञ्चालन
<p>तनहुँ। कोभिड-१९ का शंकास्पद व्यक्तिको स्वाब संकलनका लागि तनहुँको दमौली अस्पतालमा निर्माण गरिएको बुथ सञ्चालनमा आएको छ।</p>
<p>राष्ट्रिय प्रतिभा पुरस्कारबाट विभूषित युवा वैज्ञानिक व्यास नगरपालिका–४ का विकल्प ढुंगानाले निर्माण गरेकाे बुथ सञ्चालनमा ल्याइएको हो।</p>
<p>ढुंगानाले एक हप्ताको अवधिमा उक्त बुथ निर्माण सम्पन्न गरेर अस्पताललाई हस्तान्तरण गरेका हुन्। “बुथको सम्पूर्ण काम सम्पन्न गरेर अस्पताललाई हस्तान्तरण गरिएको छ”, उनले भने, “बुथ सञ्चालनका लागि तयारी अवस्थामा छ।”</p>
<p>बाहिरबाट हावा छिर्न नसक्ने गरी बनाइएको बुथभित्र स्वास्थ्यकर्मीले व्यक्तिगत सुरक्षा कवज (पीपीई) नलगाइकन पनि कोभिड-१९ का शङ्कास्पद व्यक्तिको स्वाब सङ्कलन गर्न सक्छन्। स्वाब सङ्कलनका लागि बुथ सुरक्षित रहेको ढुंगानाले बताए।</p>
<p>बुथ निर्माणको सम्पूर्ण खर्च अस्पताल विकास समितिले बेहोरेको छ। बुथ निर्माणका लागि करीब ५० हजार रूपैयाँ खर्च भएको अस्पताल विकास समितिका अध्यक्ष प्रदीपराज अधिकारीले जानकारी दिए। </p>
<p>बुथ निर्माण सम्पन्न भएकाले चिकित्सकले कोभिड-१९ का शंकास्पद बिरामीको स्वाब संकलन अब बुथभित्रै बसेर गर्नेछन्। “बाहिरको जीवाणु भित्र नजाने गरी बुथ निर्माण गरिएको छ। यो सुरक्षित भएकाले स्वास्थ्यकर्मी पनि ढुक्क भएर सेवा प्रवाहमा लाग्न सक्नेछन्”, अधिकारीले भने।</p>
<p>दमौली अस्पतालले शंकास्पद बिरामीको स्वाब सङ्कलन गरेर परीक्षणका लागि पोखरास्थित स्वास्थ्य विज्ञान प्रतिष्ठानमा पठाउने गरेको छ।</p>
<p>तनहुँमा हालसम्म २० जनाको स्वाब परीक्षण भइसकेको छ। तीमध्ये १६ जनाको रिपोर्ट नेगेटिभ आएको छ भने बाँकी चारजनाको रिपोर्ट आउन बाँकी छ।</p>
<p>ढुंगानाले नै निर्माण गरेको स्यानिटाइजर टनेलसमेत दमौली अस्पतालमा सञ्चालनमा आइसकेको छ। <em>रासस</em></p>
प्रतिक्रिया दिनुहोस्
.jpg)
