'सुरक्षा सावधानी अपनाएर काठमाडौंमा लकडाउन खुकुलो पारौं'
<p>काठमाडौं। काठमाडौंका प्रमुख जिल्ला अधिकारी जनकप्रसाद दाहालले सुरक्षा सावधानी अपनाएर उपत्यका क्षेत्रमा लकडाउन केही खुकुलो बनाउन सकिने बताएका छन्।</p>
<p>काठमाडौं प्रवेश गर्ने मुख्य नाका नागढुंगा निरीक्षणका क्रममा दाहालले उपत्यका क्षेत्रमा आवश्यक स्वास्थ्य सावधानी लगायत सुरक्षा प्रबन्ध गरेर लकडाउनलाई सहज बनाउन सकिने बताएका हुन्।</p>
<p>“अहिलेसम्मको अवस्थाको अध्ययन र फिल्डको अनुभवलाई हेर्दा लकडाउन केही सहज गर्न सकिने देखिन्छ”, उनले भने, “माथिल्लो निकायले यसबारे निर्णय गर्नेछ। तर, हामीले पनि केही सहज बनाउन सकिने सुझाव दिएका छौं।”</p>
<p><img alt="" height="540" src="https://www.dekhapadhi.com/storage/photos/shares/Security/cdo ktm janak dahal @ nagdhunga.jpg" width="960" /></p>
<p>कोरोना संक्रमणको जोखिम कम रहेको क्षेत्रमा सुरक्षा सावधानी अपनाएर लकडाउन केही खुकुलो पार्नुपर्ने विज्ञहरुले पनि सुझाव दिइरहेका छन्।</p>
<p>कोरोना भाइरस संक्रमणको जोखिम नियन्त्रणको लागि ११ चैतबाट जारी लकडाउन २५ वैशाखसम्मलाई लम्ब्याइएको छ।</p>
<p>त्यसपछि लकडाउनलाई निरन्तरता दिने वा केही स्वरुप फेर्न सकिने विषयमा आन्तरीक छलफल भने भइरहेका छन्।</p>
<p>“अहिलेसम्म सुरक्षा निकायको उच्च सावधानी र जनता सबैको सहयोगमा संक्रमण रोकथाम र नियन्त्रण प्रभावकारी देखिएको छ”, सीडीओ दाहालले भने, “उपत्यका क्षेत्रमा मोडालिटी केही परिवर्तन गरेर जानु राम्रो देखिन्छ।”</p>
<p>नागढुंगा नाकामा यात्रुवाहक सवारीसाधन पूर्ण रुपमा रोकिएका छन्।</p>
<p>मालवाहक सवारीसाधनलाई 'डिस्इन्फेन्सन टनेल' मार्फत् संक्रमणमुक्त गरेर मात्रै भित्रिने व्यवस्था मिलाइएको छ।</p>
प्रतिक्रिया दिनुहोस्
.jpg)
