फ्रान्स, इटाली र स्पेनमा घट्दै कोभिड-१९ का मृतक संख्या
<p>लन्डन। पछिल्लो २४ घण्टामा फ्रान्स, इटाली र स्पेनमा कोभिड-१९ का बिरामीको मृत्यु उल्लेख्य संख्यामा कम भएको छ।</p>
<p>पछिल्लो २४ घण्टामा फ्रान्समा एक सय ३५, स्पेनमा एक सय ६४ र इटालीमा एक सय ७४ जनाको मृत्यु भयो। </p>
<p>मार्चपछि फ्रान्समा कोभिड-१९ का बिरामीको दैनिक मृत्यु यो सबैभन्दा कम हो। </p>
<p>आगामी ११ मेदेखि फ्रान्समा लकडाउन हटाउने तयारी भइरहेको छ। त्यसपछि बालबालिका विद्यालय जान पाउने छन्। केही व्यापार, व्यवसाय खुला हुने छन्। बिनाकागजात मानिसहरू एक सय किलोमिटर टाढासम्म जान पाउने छन्।</p>
<p>मृतक संख्यामा कति कमी आउँछ, त्यसैमा लकडाउन खुकुलो बनाउँदै लैजाने सरकारी योजना कार्यान्वयनमा आउने फ्रान्सका स्वास्थ्यमन्त्रीले बताएका छन्।</p>
<p>युरोपेली मुलुक र बेलायतबाट आउने व्यक्तिहरूले फ्रान्समा दुई साता क्वारेन्टाइनमा बिताउनुपर्ने छैन।</p>
<p>यस्तै, स्पेनमा पछिल्लो २४ घण्टाको मृतक संख्या डेढ महिनायताकै दैनिक मृत्युको सबैभन्दा कम हो। स्पेनमा सात सातायता पहिलोपटक बयस्क व्यक्तिलाई गत शनिबार घरबाहिर निस्किने अनुमति दिइयो।</p>
<p>आजदेखि मानिसहरू सार्वजनिक यातायातका साधनमा मास्क लगाएर यात्रा गर्न सक्ने छन्। र, व्यावसायिक कारोबार खुला हुने छ।</p>
<p>इटालीमा दुई महिनायता सबैभन्दा कम व्यक्तिको मृत्यु भयो। आजदेखि इटालीमा लकडाउन खुकुलो बनाउँदै लैजाँदैछ, सरकारले। तर, विद्यालय, सिनेमाघर र सपिङ मलहरू बन्द नै रहने छन्।</p>
<p>इटालीमा मृतक संख्या संसारकै दोस्रो स्थानमा छ। अमेरिकामा ६८ हजार जनाको मृत्यु भएको छ भने इटालीमा २८ हजार आठ सय ८४ जनाले कोभिड-१९ का कारण ज्यान गुमाएका छन्।</p>
<p>यसैबीच, फ्रान्समा २७ डिसेम्बर २०१९ मै कोरोना भाइरस पुगिसकेको पत्ता लागेको चिकित्सकहरूले बताएका छन्। कोभिड-१९ का बिरामीको नयाँ नमूना परीक्षणबाट उक्त तथ्य पत्ता लागेको चिकित्सकहरूको भनाइ छ।</p>
<p>पेरिसका एक चिकित्सकका अनुसार २७ डिसेम्बरमै कोरोना भाइरसका संक्रमित भेटिएका थिए। तर, त्यसको धेरै सातापछि मात्र फ्रान्सले आफ्नो मुलुकमा पनि संक्रमण भेटिएको बताएको थियो।</p>
प्रतिक्रिया दिनुहोस्
.jpg)
