उत्तर कोरियाली नेता पुनः सार्वजनिक हुँदा ट्रम्प दंग
<p>वासिङ्टन। अमेरिकी राष्‍ट्रपति डोनाल्ड ट्रम्पले उत्तर कोरियाली नेता किम जोङ-उन पुनः सार्वजनिक जीवनमा फर्केकामा आफू हर्षित भएको बताएका छन्।</p>
<p>‘उनी पुनः स्वस्थ अवस्थामा सार्वजनिक जीवनमा देखिएकामा म हर्षित छु,’ ट्रम्पले ट्विटमार्फत भनेका छन्, ‘उनी फेरि फर्केका छन् र राम्रो अवस्थामा देखिँदा खुशी लागेको छ।’</p>
<p>नेता किम एक मल उद्योगको उद्घाटन समारोहमा उपस्थित भएका तस्वीरहरू सार्वजनिक भएपछि ट्रम्पले खुशी व्यक्त गरेका हुन्। उनी तीन साताको गुप्तवासपछि सार्वजनिक फर्केका हुन्।</p>
<p>गत १५ अप्रिलमा आफ्ना हजुरबा किम इल-सुङको जन्म जयन्ती समारोहमै अनुपस्थित भएपछि उनको स्वास्थ्य अवस्थाबारे विभिन्‍न अड्कलबाजी सार्वजनिक भएका थिए।</p>
<p>राष्‍ट्रपति ट्रम्प र नेता किमबीच पछिल्लो वर्षमा अनौठो सम्बन्ध गाँसिएको मानिन्छ। सन् २०१८ यता दुई नेताले तीनपटक भेटघाट गरिसकेका छन्।</p>
<p>दुवैले व्यक्तिगत पत्र पनि आदानप्रदान गर्दै आएका छन्, जसलाई ट्रम्पले ‘अत्युत्तम’ भन्‍ने गरेका छन्।</p>
प्रतिक्रिया दिनुहोस्
.jpg)
