कोभिड-१९ को उपचारमा तान्जानिया र कंगोमा हर्बल ड्रिंकको खोजी
<p>लन्डन। एकातिर संसारभरका स्वास्थ्य वैज्ञानिक कोभिड-१९ को उपचारका लागि औषधी खोज्न जुटेका छन्, अर्कातिर अफ्रिकी मुलुक तान्जानिया र कंगोका सरकारहरू एक हर्बल ड्रिंकको खोजीमा लागिपरेका छन्।</p>
<p>दुवै मुलुकमा ‘कोभिड अर्गानिक’ नामक सोही हर्बल ड्रिंक नै कोरोना भाइरसको संक्रमणबाट पार पाउने विकल्प रहेको विश्वास दुवै मुलुकमा देखिन्छ।</p>
<p>तान्जानियाका राष्‍ट्रपति जोन मागुफुलीले त आफ्ना नागरिकलाई कोरोना भाइरस संक्रमणबाट बचाउन ‘कोभिड अर्गानिक’को आयातका लागि माडागास्करमा जहाज पठाउने घोषणा नै गरेका छन्।</p>
<p>उनले उक्त हर्बल ड्रिंक कोभिड-१९ विरुद्ध सञ्‍जीवनी बुटी नै भएको बताउँदै आएका छन्। कंगोका राष्‍ट्रपति फेलिक्स सिसेकेडी पनि आफ्ना नागरिकलाई ‘कोभिड अर्गानिक’ कोरोना भाइरसविरुद्धको लडाईंमा कोशेढुंगा सावित हुने विश्वास दिलाइरहेका छन्।</p>
<p>‘आर्टमिजिया’ नामक वनस्पतिबाट उक्त हर्बल ड्रिंक बन्छ। मलेरियाको उपाचरमा पनि सोही वनस्पतिको प्रयोग हुँदै आएको छ।</p>
<p>विश्व स्वास्थ्य संगठनले भने कोभिड-१९ को औषधी हालसम्म उपलब्ध नरहेको बताउँदै आएको छ। र, आफू खुशी गरिने उपचारबाट बच्न मानिसहरूलाई आग्रह गर्दै आएको छ।</p>
<p>माडागास्करका राष्‍ट्रपतिकी मुख्य सहयोगीले २० भन्दा कम व्यक्तिमा तीन साताभित्र गरिएको परीक्षणमा उक्त हर्बल ड्रिंक कोभिड-१९ को उपचारमा उपयोगी देखिएको दाबी गरेकी छन्। सोही कारण ‘कोभिड अर्गानिक’लाई आधिकारिक रूपमा लन्च गरिएको उनको भनाइ छ।</p>
<p>गत मार्चमा अमेरिकाको नेसनल सेन्टर फर कम्प्लिमेन्ट्री एन्ड इन्टिग्रेटिभ हेल्थले कोभिड-१९ को उपचारमा हर्बल थेरापी र चियाको प्रयोग उपयुक्त नभएको स्पष्‍ट गरेको थियो।</p>
<p>त्यसका बावजुद अफ्रिकी मुलुकहरूमा हर्बल चियाको माग बढ्दो छ। बीबीसीका अनुसार गत शनिबार माडागास्करले ‘कोभिड हर्बल’को पहिलो खेप गिनीबिसाउ निर्यात गरेको छ।</p>
प्रतिक्रिया दिनुहोस्
.jpg)
