लकडाउनको स्वरुपबारे विज्ञसँग छलफल गर्न उच्चस्तरीय समिति बैठक बस्दै
<p>काठमाडौं। कोभिड-१९ रोकथाम तथा नियन्त्रण गर्न गठित उच्चस्तरीय समितिको बैठक बस्दैछ। दिउँसो २ बजे प्रधानमन्त्री तथा मन्त्रिपरिषद्को कार्यालय सिंहदरबारमा बैठक बस्‍न लागेको समितिका संयोजक उपप्रधान तथा रक्षामन्त्री ईश्‍वर पोखरेलका प्रेस संयोजक लोकेन्द्र केसीले जानकारी दिए।</p>
<p>उच्चस्तरीय समितिले लकडाउनको स्वरूपबारे विषय विज्ञसँग आजको बैठकमा छलफल गर्न लागेको छ। ४२ दिनदेखि जारी लकडाउन सरकारले पछिल्लो समय २५ वैशाखसम्म निरन्तरता दिएको छ। </p>
<p>लकडाउनलाई निरन्तरता दिने वा केही खुकुलो बनाउने भन्‍ने विषयमा विभिन्‍न क्षेत्रबाट सुझाव आइरहेको बेला सरकारले विज्ञहरुसँग छलफल गरेर एउटा मोडालिटी तयार गर्न लागेको हो। </p>
<p>सुरक्षा निकायका प्रमुखहरूले पनि देशैभर लकडाउन गर्नुभन्दा पनि जोखिम रहेको क्षेत्रमा निरन्तरता दिने र जोखिम नभएको क्षेत्रमा आवश्यक सावधानी अपनाएर केही खुकुलो पार्नुपर्ने सुझाव गृह मन्त्रालयलाई दिइसकेका छन्। </p>
<p>मुख्यतया भारतसँग सीमा जोडिएका जिल्लाहरुमा उच्च निगरानी गर्नुपर्ने र लकडाउनमा कडाइ गर्नुपर्ने सुझाव समेटिएको छ।</p>
<p>हिजो गृहमन्त्री रामबहादुर थापाको अध्यक्षतामा बसेको सुरक्षा निकायका प्रमुखहरूको बैठकमा पनि लकडाउनको स्वरूपका बारेमा छलफल भएको थियो। </p>
<p>नेपालमा संक्रमितको संख्या बढिरहेकाले अहिले नै लकडाउन खुकुलो बनाउँदा थप संक्रमणको जोखिम हुन सक्ने पनि सुझाव आएको छ। स्वास्थ्यकर्मीहरू पनि सर्वसाधारण आफै‌ सचेत भएर भौतिक दूरी कायम गर्नुपर्ने र लकडाउनको पालना गर्न सचेत हुनुपर्ने बताउँछन्। </p>
<p>तर प्रधानमन्त्री केपी शर्मा ओलीले हिजोको मन्त्रिपरिषद्को बैठकमा मन्त्रीहरूलाई सीमा अहिले नै खुला गर्न नसकिने बरु थप कडाइ गर्नुपर्ने र लकडाउन कडा पार्न निर्देशन दिएका थिए। प्रधानमन्त्रीको उक्त निर्देशनलाई आधार मान्‍ने हो भने पनि केही दिन अझै लकडाउनले निरन्तरता पाउने अधिकारीहरू बताउँछन्। </p>
<p>नेपालगञ्‍जमा हिजो एकैदिन १५ जनामा संक्रमण पुष्टि भएपछि थप सुरक्षा निगरानी बढाउनुपर्ने देखिएको कतिपयको सुझाव छ।</p>
प्रतिक्रिया दिनुहोस्
.jpg)
