कोभिड-१९: विदेशमा फसेका नागरिक फिर्ता गर्दै भारत
<p>नयाँदिल्ली। कोभिड-१९ को महामारीका कारण संसारभर लकडाउन जारी रहँदा विदेशमा अलपत्र परेका आफ्ना नागरिक भारतले फिर्ता ल्याउने भएको छ।</p>
<p>उनीहरूलाई फिर्ता ल्याउन केन्द्र सरकारले अनुमति दिएको छ। हवाई जहाज तथा नौसेनाका जहाजमार्फत भारतीय नागरिकलाई फिर्ता ल्याउन सरकारले निर्देशन दिएको छ।</p>
<p>त्यसका लागि सूची तयार भइरहेको भारतीय विदेश मन्त्रालयले जनाएको छ। स्वदेश फर्किने खर्च भने यात्री स्वयंले व्यहोर्नुपर्ने मन्त्रालयको भनाइ छ।</p>
<p>विमानमा चढ्नुअघि यात्रीको मेडिकल स्क्रिनिङ गरिने छ। जसको शरीरमा कोरानाको लक्षण देखिँदैन, उसले मात्र स्वदेश फर्किन पाउने छ।</p>
<p>गन्तव्यमा पुगेपछि सबै यात्रीको फेरि जाँच गरिने छ। र, १४ दिनसम्म अनिवार्य क्‍वारेन्टाइनमा राखिने छ।</p>
<p>१४ दिन बितेपछि पुनः कोभिड-१९ जाँच गरिने छ। अनि मात्र घर पुग्‍न पाउने छन्। यो प्रक्रिया ७ मेदेखि शुरु हुने विदेश मन्त्रालयलाई उद्धृत गर्दै बीबीसीले जनाएको छ।</p>
प्रतिक्रिया दिनुहोस्
.jpg)
