Others

गृहपृष्ठ

लकडाउनबारे निर्णय गर्न उच्चस्तरीय समितिको बैठक बस्दै, प्रधानमन्त्री पनि सहभागी हुने काठमाडौं। कोभिड-१९ रोकथाम र नियन्त्रण गर्न गठित उच्चस्तरीय समितिको बैठक आज अपरान्ह ४ बजे बस्दैछ।  लकडाउनबारे निर्णय गर्ने गरी प्रधानमन्त्री तथा मन्त्रिपरिषद्को कार्यालय सिंहदरबारमा बैठक बस्&zwj;न लागेको उपप्रधान तथा रक्षामन्त्री ईश्वर पोखरेलका स्वकीय सचिव दीपेन्द्र श्रेष्ठले जानकारी दिए। उनका अनुसार आजको बैठकमा प्रधानमन्त्री केपी शर्मा ओली पनि सहभागी हुन लागेका छन्। “समितिको हिजो बसेको बैठकले एउटा खाका तय गरेको छ। त्यसमा आज प्रधानमन्त्रीसमेत उपस्थित भएर अझ गहन छलफल हुन्छ,” श्रेष्ठले भने, “आजको बैठकबाट केही परिमार्जनसहित मन्त्रिपरिषद्को बैठकमा पेश भएर निर्णय हुनेछ।” आजको बैठकमा प्रधानमन्त्रीको समेत धारणा आएपछि उच्चस्तरीय समितिको बैठकले खाका तय गर्नेछ। उच्चस्तरीय समितिले लकडाउनलाई निरन्तरता नै दिने तयारी गरिसकेको छ। समितिले देशभर लकडाउन यथावत नराखेर जोखिम देखिएको र कम जोखिम क्षेत्रको अवस्था हेरेर लकडाउनलाई निरन्तरता दिने खाका तय भइसकेको छ।  समितिको हिजोको बैठकमा विज्ञहरूलाई समेत सहभागी गराएर खाका तयार गरिएको हो। “लकडाउनले आर्थिक गतिविधिमा समेत असर गर्दै गइरहेको छ,” समितिका एक सदस्यले भने, “अबको मोडालिटी भनेको देशभर आर्थिक गतिविधि नरोकिने गरेर अवस्था हेरेर लकडाउनलाई निरन्तरता दिइने छ।” समितिले कम्तिमा दुई सातासम्म स्वरूप परिवर्तन गरेर लकडाउनलाई जारी राख्&zwj;ने खाका तयार गरेको हो। कोभिड-१९ को संक्रमणबाट जोगिन सरकारले ११ चैतदेखि देशभर लकडाउन गरेको छ। नेपालमा अहिले कोराना संक्रमितको संख्या ८२ पुगिसकेको छ।  तीमध्ये १६ जना निको भएर घर फिरेका छन्। अहिले उदयपुर, वीरगञ्&zwj;ज र नेपालगञ्&zwj;जलाई धेरै जोखिम क्षेत्र मानिएको छ। भारतसँग सीमा जोडिएका इलाकामा जोखिम उच्च रहेको निष्कर्ष निकाल्दै सुरक्षा निकायका प्रमुखहरूले पनि त्यहाँ थप कडाइ र लकडाउनलाई निरन्तरता दिनुपर्ने सुझाव दिइसकेका छन्।