क्वारेन्टाइन जाँदै गर्दा मृत्यु भएका वृद्धमा कोभिड-१९ नेगेटिभ
<p>धनगढी। बैतडीको झुलाघाट नाकाबाट १८ वैशाखमा नेपाल प्रवेश गरी क्‍वारेन्टाइनतर्फ जाँदै गर्दा बाटोमै मृत्यु भएका वृद्धमा कोराना भाइरस नेगेटिभ पाइएको छ।</p>
<p>बैतडीको पुर्चौंडी-६ मनकालीका ६७ वर्षीय जुने लुहारको अचानक मृत्यु भएपछि कोभिड-१९ परीक्षण गरिएको थियो। परीक्षणबाट उनमा कोरोना भाइरसको संक्रमण नदेखिएको जिल्ला स्वास्थ्य कार्यालय बैतडीका प्रमुख योगेशप्रसाद भट्टले जानकारी दिए।</p>
<p>उनका अनुसार लुहारको मृत्युपछि थ्रोट स्वाब संकलन गरेर परीक्षणका लागि धनगढी पठाइएको थियो। </p>
<p>यस्तै, कोरोना संक्रमणको आशंकामा सेती प्रादेशिक अस्पतालमा भर्ना भएका कञ्‍चनपुर र कैलालीका तीनजनाको रिपोर्ट पनि नेगेटिभ आएको छ। </p>
<p>गौरीगंगा नगरपालिकाको मसुरियाका ३२ वर्षीय पुरुष र उनकी आठ वर्षकी छोरीलाई उच्च ज्वरो र रुघाखोकी लागेपछि २१ वैशाखमा सेती अस्पतालमा भर्ना गरिएको थियो। दुवै जनाको रिपोर्ट नेगेटिभ आएको अस्पतालका सूचना अधिकारी दिलिपकुमार श्रेष्‍ठले बताए।</p>
<p>यस्तै, कञ्‍चनपुरको शुक्लाफाँटा नगरपालिकाकी १८ वर्षीय युवतीको रिपोर्ट पनि नेगेटिभ आएको उनले जानकारी दिए।</p>
<p>यसैगरी, कालिकोटको शुभकालिका गाउँपालिका घर भई हाल कैलालीको अत्तरियामा बस्दै आएका २१ वर्षीय पुरुषलाई आइसोलेसनमा राखेर उपचार भइरहेको छ। आज उनको थ्रोट स्वाब संकलन गरिने अस्पतालले जनाएको छ।</p>
प्रतिक्रिया दिनुहोस्
.jpg)
