विश्वका कम्युनिष्ट पार्टीहरूको बैठक टर्कीमा
<p>टर्की। विश्वका कम्युनिष्ट तथा श्रमिक पार्टीहरूको २१ औं बैठक टर्कीको इज्मिरमा जारी छ।</p>
<p>बैठकमा नेपाल कम्युनिष्ट पार्टी (नेकपा)ले आ–आफ्ना देशका मौलिक विशेषताहरूलाई ख्याल गर्दै कम्युनिष्ट पार्टीलाई लोकप्रिय, जनमुखी र बलियो बनाउन सक्दा मात्रै परिवर्तनको सपनालाई साकार गर्न सकिनेमा जोड दिएको छ।</p>
<p>नेकपाका तर्फबाट केन्द्रीय सदस्य तथा विदेश विभाग उपप्रमुख विष्णु रिजालले यसैमा जोड दिएका कारण नेकपा लोकप्रिय, क्रान्तिकारी र लोकतान्त्रिक शक्तिका रूपमा स्थापित भएको स्मरण गराए।</p>
<p>बैठकमा ६० देशका ७५ कम्युनिष्ट पार्टीहरूको सहभागिता छ। बैठकको आयोजना टर्की र ग्रीसका कम्युनिष्ट पार्टीले संयुक्त रूपमा गरेका हुन्।</p>
<p>विश्वका सबै खालका कम्युनिष्ट पार्टीहरूको साझा मञ्चका रूपमा रहेको कम्युनिष्ट तथा श्रमिक पार्टीहरूको अन्तर्राष्ट्रिय बैठक (आइएमसीडब्लुपी)नामक उक्त मञ्च सन् १९९८ बाट हरेक वर्ष आयोजना हुँदै आएको छ।</p>
<p>सन् १९१९ मा लेनिनको नेतृत्वमा ‘कम्युनिष्ट इन्टरनेशनल’ स्थापना भएको सय वर्षको सन्दर्भ पारेर आयोजना गरिएको बैठकको मुल नारा ‘कम्युनिष्ट अन्तर्राष्ट्रिय स्थापनाको सयौं वार्षिकोत्सवः शान्ति र समाजवादका लागि लडाइँ जारी छ’ रहेको छ।</p>
<p>बैठक तीन दिनसम्म चल्नेछ।</p>
<p>बैठकको शुरुवात आयोजक टर्की कम्युनिष्ट पार्टीका महासचिव केमल ओकुयान र ग्रीस कम्युनिष्ट पार्टीका महासचिव दिमित्रिस कोत्सोम्वसले गरेका थिए।</p>
<p>कम्युनिष्ट आन्दोलनका अनुभवबाट शिक्षा लिँदै यसको भविष्यका लागि समय सापेक्ष हुन विश्वका कम्युनिष्ट पार्टीहरूलाई नेपालका तर्फबाट आह्वान गरिएको छ।</p>
<p> </p>
प्रतिक्रिया दिनुहोस्
.jpg)
