विराटनगरमा उपचाररत ६ जना कोरोनामुक्त, भोलि बिहान डिस्चार्ज गरिने
<p>विराटनगर। विराटनगरस्थित कोशी अस्पतालको आइसोलेसनमा उपचाररत ६ जना कोरोना संक्रमितलाई भोलि, २४ वैशाखमा डिस्चार्ज गरिने भएको छ।</p>
<p>डिस्चार्ज गर्न लागिएका सबै भारतीय नागरिक हुन्। उदयपुरको त्रियुगा नगरपालिका-३ भुल्केमा बसेका उनीहरूलाई ५ वैशाखमा कोभिड-१९ पुष्‍टि भएको थियो।</p>
<p>दोस्रो र तेस्रो पटक गरिएको थ्रोट स्वाब नमूना परीक्षणको नतिजा नेगेटिभ आएकाले उनीहरूलाई डिस्चार्ज गर्न लागिएको प्रदेश १ कोभिड-१९ निगरानी, प्रतिवेदन तथा अनुगमन सचिवालय एवं मोरङ जनस्वास्थ्य प्रमुख ज्ञानबहादुर बस्‍नेतले बताए।</p>
<p>"उहाँहरू निको हुनुभएको छ। अहिलेसम्मको अवस्था हेर्दा भोलि बिहान ८ बजे डिस्चार्जको तयारी गरिएको छ", बस्‍नेतले <em>देखापढी</em>सँग भने।</p>
<p>उपचारपश्‍चात कोरोना मुक्त भएकाहरूमा ३० वर्षीय अनुस जैदी, २९ वर्षीय मोहम्मद अजिज, २८ वर्षीय मोहम्मद जावेद, २१ वर्षीय मोहम्मद अहमद साहेव, ३४ वर्षीय मोहम्मद अजिरवान र २६ वर्षीय मोहम्वद राशिद रहेको सामाजिक विकास मन्त्रालयले आज पत्रकार सम्मेलन गरी जानकारी दिएको छ।</p>
<p>नेपाल-भारत सीमा बन्द भएको र दुवैतर्फ लकडाउन रहेका कारण उनहहरूलाई केही दिन विराटनगर-१६ रानीस्थित एक मस्जिदमा निर्माण गरिएको क्वारेन्टाइनमा राखिने भएको छ।</p>
<p>उदयपुरका २८, झापाका दुई र भोजपुरका एक गरी प्रदेश १ मा ३१ जना संक्रमित फेला परेका छन्।</p>
<p>सबैजनाको स्वास्थ्य अवस्था सामान्य रहेको अस्पतालले जनाएको छ।</p>
प्रतिक्रिया दिनुहोस्
.jpg)
