‘प्रोफेसर लकडाउन’ आफैंले उल्लंघन गरे ‘सोसल डिस्ट्यान्सिङ’
<p>लन्डन। प्राध्यापक निल फर्गुसन बेलायतमा कोभिड-१९ फैलिन नदिन लकडाउन सिफारिस गर्ने विज्ञ हुन्। त्यसैले उनले बेलायतमा ‘प्रोफेसर लकडाउन’को उपनाम नै पाएका छन्।</p>
<p>तर, उनी आफैंले ‘सोसल डिस्ट्यान्सिङ’ उल्लंघन गरेपछि विवादमा परेका छन्। सोही कारण कोभिड-१९ को मामिलामा बेलायत सरकारको प्रमुख सल्लाहकार पदबाट उनले राजिनामा दिनु परेको छ।</p>
<p>“मैले गल्ती गरें, म स्वीकार गर्छु,” आफ्नो राजिनामा घोषणा गर्दै प्रोफेसर फर्गुसनले भने, “महामारी नियन्त्रणमा लिन सोसल डिस्ट्यान्सिङको पलना अत्यावश्यक छ, जसको मैले नजरअन्दाज गरें।”</p>
<p>उनले एक महिलालाई आफ्नो निकट आउन दिएर भौतिक दूरी कायम राख्नुपर्ने प्रावधान उल्लंघन गरेको समाचार डेली टेलिग्राफले प्रकाशित गरेको थियो।</p>
<p>बीबीसीका अनुसार उनी सेन्टर फर ग्लोबल इन्फेक्सस डिजिज एनालाइसिसका निर्देशक थिए। यो संस्थाले सरकारहरू र विश्‍व स्वास्थ्य संगठनलाई अफ्रिकामा इबोलादेखि कोभिड-१९ को महामारीसम्मका बारेमा परामर्श दिने गर्छ।</p>
<p>यही संस्थाले गत जनवरीमा संसारभर कोभिड-१९ को जोखिमका बारेमा सचेत गराएको थियो। चीनले वुहानमा थोरै मानिसमा कोरोना भाइरस संक्रमण रहेको बताइरहँदा यही संस्थाले त्यो आँकडा सयौं हुन सक्ने बताएको थियो।</p>
<p>प्रोफेसर फर्गुसनको टिमको सल्लाहअनुसार नै बेलायती प्रधानमन्त्री बोरिस जोनसनले २३ मार्चमा लकडाउन घोषणा गरेका थिए।</p>
प्रतिक्रिया दिनुहोस्
.jpg)
