लकडाउनको अवधि र स्वरूपबारे निर्णय गर्न मन्त्रिपरिषद्को बैठक बस्दै
<p>काठमाडौं। आज मन्त्रिपरिषद् बैठक बस्दैछ। आज बिहान ११ बजे प्रधानमन्त्री निवास बालुवाटारमा बैठक बस्‍न लागेको प्रधानमन्त्रीका प्रेस सल्लाहाकार सूर्य थापाले <em>देखापढी</em>लाई बताए।</p>
<p>डेढ महीनादेखि जारी लकडाउनको अवधि थप्‍ने/नथप्‍ने र लकडाउनको अबको स्वरूप कस्तो हुने भन्‍ने आजको बैठकको मुख्य अजेण्डा छ।</p>
<p>कोभिड-१९ रोकथाम र नियन्त्रण गर्न गठित उच्चस्तरीय समितिको हिजो बसेको बैठकले लकडाउनलाई निरन्तरता दिनुपर्नेमा जोड दिएको थियो।</p>
<p>प्रधानमन्त्री केपी शर्मा ओलीकै उपस्थितिमा बालुवाटारमा बसेको उच्चस्तरीय समितिको बैठकले संक्रमण रोकथाम र नियन्त्रण गर्न लकडाउन प्रभावकारी बनिरहेको निष्कर्ष निकाल्दै केही दिन निरन्तरता दिन सिफारिस गरिसकेको छ।</p>
<p>यद्यपी लकडाउनले देशैभर निरन्तर हुने वा जोखिमयुक्त क्षेत्रमा लकडाउन कडाइ गरेर कम जोखिम भएको क्षेत्रमा केही खुकुलो बनाउने भन्ने निर्णयको विकल्पबारे पनि छलफल भइरहेको छ।</p>
<p>लामो समय लकडाउन कायम रहँदा त्यसले अर्थतन्त्र र दैनिक जनजीवनमा कठीनाइ हुने भन्दै केही खुकुलो बनाउनुपर्ने सुझाव पनि आइरहेको छ।</p>
<p>सुरक्षा निकायले पनि सीमा जोडिएका जिल्लाहरुमा थप कडाइ गरेर लकडाउन प्रभावकारी बनाउनुपर्ने र जोखिम कम भएको क्षेत्रमा केही खुकुलो बनाउन सुझाव पेश गरेका छन्।</p>
<p>कोरोना भाइरस संक्रमण विस्तार रोक्न सरकारले गएको ११ चैतदेखि लकडाउन लागू गरिएको थियो। पछिल्लोपटक थपिएको लकडाउनको अवधि भोलि, २५ वैशाखमा सकिँदैछ।</p>
प्रतिक्रिया दिनुहोस्
.jpg)
