कोरोना जितेर २० दिनपछि डिस्चार्ज भए कोशी अस्पतालका ६ जना संक्रमित
<p>विराटनगर। विराटनगरस्थित कोशी अस्पतालअन्तर्गतको कोभिड-१९ उपचार केन्द्रमा रहेकामध्ये ६ जना निको भएका छन्।</p>
<p>दोस्रो र तेस्रो पटक गरिएको कोभिड-१९ परीक्षणमा नतिजा नेगेटिभ देखिएकोले उनीहरूलाई केही बेरअघि मात्र डिस्चार्ज गरिएको प्रदेश १ कोभिड-१९ निगरानी, प्रतिवेदन तथा अनुगमन सचिवालयका प्रमुख ज्ञानबहादुर बस्‍नेतले <em>देखापढी</em>लाई बताए।</p>
<p>अस्पताल परिसर पुगेका सामाजिक विकास मन्त्री जीवन घिमिरे, अस्पतालका चिकित्सकलगायतको टोलीले निको भएकाहरूको पूर्ण स्वास्थ्य लाभको कामना गरेका छन्।</p>
<p>कोरोनामुक्त भएका सबैजना भारतीय नागरिक हुन्।</p>
<p>उदयपुरको त्रियुगा नगरपालिका-३ भुल्केमा बसेका उनीहरूलाई ५ वैशाखमा कोभिड-१९ पुष्‍टि भएको थियो।</p>
<p>आज डिस्चार्ज गरिएपनि नेपाल-भारत सीमा बन्द भएको र दुवैतर्फ लकडाउन रहेका कारण ती ६ जना केही दिन विराटनगर-१६ रानीस्थित एक मस्जिदमा निर्माण गरिएको क्वारेन्टाइनमा बस्‍ने सामाजिक विकास मन्त्रालयले जनाएको छ।</p>
<p>कोरोना मुक्त भएकाहरूमा ३० वर्षीय अनुस जैदी, २९ वर्षीय मोहम्मद अजिज, २८ वर्षीय मोहम्मद जावेद, २१ वर्षीय मोहम्मद अहमद साहेव, ३४ वर्षीय मोहम्मद अजिरवान र २६ वर्षीय मोहम्वद राशिद छन्।</p>
<p>प्रदेश १ मा सबैभन्दा बढी ३१ जनामा कोभिड-१९ देखिएको थियो। तीमध्ये उदयपुरमा २८, झापामा दुई र भोजपुरमा एकजना संक्रमित भेटिएका हुन्।</p>
<p>अब कोशी अस्पतालको आइसोलेसनमा २५ जना संक्रमित उपचाररत छन्।</p>
प्रतिक्रिया दिनुहोस्
.jpg)
