स्थायी समितिका अजेन्डा तय गर्न नेकपा सचिवालय बैठक बस्दै
<p>काठमाडौं। सत्तारुढ दल नेपाल कम्युनिस्ट पार्टी(नेकपा) सचिवालयको बैठक आज बस्दैछ। भोलिदेखि शुरु हुने पार्टीको स्थायी समितिको बैठकका अजेन्डा तय गर्न सचिवालयको बैठक आज बस्‍न लागेको हो। </p>
<p>२० वैशाखमा बसेको सचिवालय बैठकले २५ वैशाखमा स्थायी समिति बैठक बोलाउने निर्णय गरेको थियो। स्थायी समितिको बैठकमा छलफल गर्ने अजेन्डा तय गर्न सोही दिन आज दिउँसो ३ बजेका लागि सचिवालय बैठक बस्‍ने निर्णय भएको थियो। </p>
<p>प्रधानमन्त्री निवास बालुवाटारमा बस्‍ने सचिवालय बैठकमा स्थायी समितिमा प्रस्तुत गर्ने अजेन्डाका बारेमा नेताहरूले घनिभुत छलफल गर्ने देखिएको छ। </p>
<p>गत बिहीबार बसेको सचिवालयको बैठकपछि पनि नेताहरूले आन्तरिक छलफल र भेटघाटलाई तीव्र बनाएका थिए। प्रधानमन्त्री केपी शर्मा ओलीले अर्का अध्यक्ष पुष्‍पकमल दाहाल, माधवकुमार नेपाल, झलनाथ खनाललगायत नेतासँग यसबीचमा छलफल गरेका छन्। </p>
<p>दाहाल-नेपाल समूहको पनि पटक-पटक यसबीचमा भेटघाट र छलफल भएको छ। नेपाल समूहले स्थायी समितिको बैठकमा कडा रूपमा प्रस्तुत हुने रणनीति तय गरेको नेताहरू बताउँछन्।</p>
<p>पार्टीलाई एकताबद्ध बनाएर लैजाने भनेर यसअघिको सचिवालय बैठकमा निर्णय भए पनि नेताहरू स्थायी कमिटीको बैठकमा छलफल गर्नुपर्ने अजेन्डामा सहमत हुन सकिरहेका छैनन्। </p>
<p>नेकपाको ४५ सदस्यीय स्थायी समितिमा अहिले ४४ जना छन्। अग्‍निप्रसाद सापकोटा सभामुखमा निर्वाचित भएपछि स्थायी समितिको संख्या ४४ भएको हो। आजको सचिवालय बैठकमा नेताहरूले सहमतिका आधारमा नै स्थायी समितिको बैठकमा छलफल गर्ने अजेन्डा तय गर्ने बताइएको छ।</p>
प्रतिक्रिया दिनुहोस्
.jpg)
