अन्तरिक्षमा फिल्म सुटिङ गर्दै हलिउड अभिनेता टम क्रुज
<p>न्युयोर्क। हलिउड अभिनेता टम क्रुज अन्तरिक्षमा फिल्म सुटिङको तयारीमा रहेको अमेरिकी अन्तरिक्ष एजेन्सी (नासा)ले पुष्‍टि गरेको छ। </p>
<p>इन्टरनेसनल स्पेस स्टेसन (आईएसएस)मा पुगेर उनी आफ्नो आगामी फिल्मको सुटिङ गर्ने तयारीमा रहेको नासाले प्रष्‍ट्याएको छ।</p>
<p>करिब अढाइ सय माइल टाढाबाट पृथ्वीको परिक्रमा गरिरहेको आईएसएसमा उनको नयाँ फिल्म सुटिङ हुने नासाका प्रवक्ताले बताएका छन्। </p>
<p>आईएसएसले सन् २००० यता निरन्तर पृथ्वीको फेरो मारिरहेको छ। आईएसएसमा अन्तरिक्ष पर्यटनका लागि पनि उपयोग गर्ने योजना छ।</p>
<p>यसअघि पप स्टार लान्स बासले पनि आईएसएसमा पुगेर पृथ्वीको फेरो मार्ने योजना बनाएका थिए। तर, उनको योजना पूरा हुन पाएन।</p>
<p>अन्तरिक्षमा हालसम्म कमै फिल्मको सुटिङ भएको छ। त्यसमध्ये सन् २००२ मा तयार भएको वृत्तचित्र ‘आईम्याक्स’ पनि हो। त्यस वृत्तचित्रमा अभिनेता क्रुजले आवाज दिएका थिए।</p>
<p>यस्तै, सन् २०१२ मा अन्तरिक्ष पर्यटक रिचार्ड गेरिओटले फिल्म ‘अपोजी अफ फियर’ अन्तरिक्षमै खिचेका थिए। यो साइन्स फिक्सन फिल्म थियो। तथापि, टम क्रुज अलौकिक यात्रामा निस्किने पहिलो अभिनेता बन्दैछन्।</p>
<p>“हामी यस महत्वाकांक्षी परियोजनामा अगाडि बढिसकेका छौं,” नासाका प्रशासक जिम ब्राइडेन्सटाइनले ट्विटमा भनेका छन्।</p>
<p>सीएनएनका अनुसार क्रुजको उक्त फिल्म पहिलो एक्सन एडभेन्चर फिल्म हुनेछ। क्रुज कहिले आईएसएसका लागि पृथ्वीबाट प्रस्थान गर्ने छन् र उनका साथमा कतिजना क्रु मेम्बर हुने छन् भन्‍ने खुलाइएको छैन।</p>
प्रतिक्रिया दिनुहोस्
.jpg)
