अहिले जनघनत्व रहेको क्षेत्रमा ५० वर्षपछि अत्यधिक गर्मीः अध्ययन
<p>हङकङ। पृथ्वीको तापमान अहिलेकै गतिमा बढिरह्यो भने ५० वर्ष हाल जनघनत्व रहेका क्षेत्रमा अत्यधिक गर्मी हुने एक अध्ययनको निष्‍कर्ष छ।</p>
<p>ती क्षेत्रमा अहिले तीन अर्बभन्दा बढी जनसंख्याको बसोबास छ। अनुकुल मौसम, सहज तापमान, फल्ने, फुल्ने वनस्पति, भोजनको उचित प्रबन्ध, पशुपक्षीको सामिप्यतालगायत अनुकुलताका कारण मानव जाति हजारौं वर्षदेखि पृथ्वीमा बस्दै आएको छ।</p>
<p>अमेरिकाको नेसनल एकेडेमी अफ साइन्सेसको सहजीकरणमा पुरातत्वविद्, मौसम वैज्ञानिक र पर्यावरणविद्हरू सम्मिलित टोलीले गरेको अध्ययनमा उक्त निष्‍कर्ष निस्किएको हो।</p>
<p>सीएनएसका अनुसार अहिलेकै गतिमा ग्रिनहाउस ग्यास उत्सर्जन जारी रहे सन् २०७० देखि मानव जातिले ६ हजार वर्षयता भोग्दै आएको सुन्दर जीवन संकटमा पर्ने अध्ययनको निष्‍कर्ष छ।</p>
<p>“त्यतिबेला एक डिग्री तापमान बढ्दा एक अर्ब मानिसले चिसो इलाकातिर बसाइँ सर्नुपर्नेछ या चर्को गर्मीमा अनुकुलन भएर बस्नुपर्नेछ,” अध्ययनको रिपोर्टमा भनिएको छ।</p>
<p>अध्ययनमा संलग्न युनिभर्सिटी अफ वासिङ्टनका पुरातत्वविद् टिम कोलरले अहिलेको परिस्थितिमा परिवर्तन ल्याउन नसकिए भविष्‍यमा भयावह अवस्था व्यहोर्नुपर्ने देखिएको बताए।</p>
<p>पृथ्वीको अधिकांश जनसंख्या ११ देखि १५ डिग्री सेल्सियसबीचको तापमानमा बस्छ। २० देखि २५ डिग्री सेल्सियसबीचमा बस्ने दक्षिण एसियाको जनसंख्या भारतीय उपमहाद्विपको मौसमबाट प्रभावित छ।</p>
<p>पृथ्वीको अहिलेको सबैभन्दा गर्मी इलाका हो, अफ्रिकाको सहारा क्षेत्र, जहाँ २९ डिग्री सेल्सियसको औसत तापमान रहन्छ। </p>
<p>अहिलेकै गतिमा तापमान वृद्धि भइरहे सन् २०७० सम्ममा सबै क्षेत्रमा सात दशमलव पाँच प्रतिशतले तापक्रम बढ्ने देखिएको अध्ययनको निष्‍कर्ष छ।</p>
प्रतिक्रिया दिनुहोस्
.jpg)
