लकडाउन थप गर्नेबारे निर्णय गर्न बालुवाटारमा मन्त्रिपरिषद् बैठक जारी
<p>काठमाडौं। मन्त्रिपरिषद्को बैठक प्रधानमन्त्री निवास बालुवाटारमा अहिले बसिरहेको छ।</p>
<p>लकडाउनको अवधि कति दिन र कुन स्वरूपमा थप गर्ने विषयमा बैठकमा छलफल भइरहेको प्रधानमन्त्रीका प्रेस सल्लाहकार सूर्य थापाले जानकारी दिए।</p>
<p>कोरोना जोखिमयुक्त क्षेत्रमा लकडाउन कडाइ गरेर कम जोखिम भएको क्षेत्रमा केही खुकुलो बनाउने भन्ने निर्णयको विकल्पबारे पनि छलफल भइरहेको छ।</p>
<p>त्यसबाहेक कोभिड-१९ रोकथाम, उपचारमा अहिलेसम्म गरिएका कामको समीक्षा र भावी रणनीतिको बारे पनि बैठकमा छलफल भइरहेको छ।</p>
<p>कोभिड-१९ रोकथाम र नियन्त्रण गर्न गठित उच्चस्तरीय समितिको हिजो बसेको बैठकले कोरोना भाइरस संक्रमण रोकथाम र नियन्त्रण गर्न लकडाउन प्रभावकारी बनिरहेको निष्कर्ष निकाल्दै अवधि थप गर्न सरकारलाई सिफारिस गरिसकेको छ।</p>
<p>विश्‍वव्यापी महामारी बनेको कोभिड-१९ को जोखिम फैलिन नदिन ११ चैतदेखि लकडाउन जारी छ। </p>
<p>पछिल्लोपटक १४ वैशाखमा बसेको मन्त्रिपरिषद् बैठकले थपेको लकडाउनको अवधि भोलि, २५ वैशाखमा सकिँदैछ।</p>
प्रतिक्रिया दिनुहोस्
.jpg)
