इरानमा फेरि फर्कियो कोरोना कहर
<p>तेहरान। केही दिनयता इरानमा कोभिड-१९ को महामारी नियन्त्रणमा आएकोजस्तो देखिएको थियो। तर, हिजो २४ घण्टामा अचानक एक हजार ६ सय ८० नयाँ बिरामी देखिएका छन्।</p>
<p>११ अप्रिलयता एकैदिनमा त्यति धेरै नयाँ बिरामी फेला परेको यो पहिलोपटक हो। यससँगै इरानमा कोरोना भाइरस संक्रमणका बिरामी एक लाख नाघेका छन्।</p>
<p>मध्यपूर्वका देशमध्ये कोभिड-१९ को सबैभन्दा ठूलो चपेटामा इरान छ। र, त्यहाँ कोभिड-१९ को दोस्रो तरंग शुरु भएको कतिपयको विश्लेषण छ।</p>
<p>“पछिल्ला ३-४ दिनमा कोरोना भाइरस संक्रमणको केस एकाएक बढेको छ,” इरानी स्वास्थ्य मन्त्रालयका प्रवक्ताले भने, “यो मानिसहरू अनावश्यक यात्रामा निस्किनुको परिणाम हुन सक्छ।”</p>
<p>बीबीसीका अनुसार इरानले ११ अप्रिलदेखि लकडाउन खुकुलो बनाएको थियो। र, कम जोखिमवाला इलाकामा मस्जिदहरू पनि खोलेको थियो। पछिल्लो २४ घण्टामा इरानमा कोभिड-१९ का कारण ७८ जनाको मृत्यु भएको छ। त्यससँगै मृतक संख्या ६ हजार चार सय १८ पुगेको छ।</p>
प्रतिक्रिया दिनुहोस्
.jpg)
