श्रमिकलाई कामबाट निकाल्न पाइँदैनः मन्त्री भट्टराई
<p>काठमाडौं। संस्कृति, पर्यटन तथा नागरिक उडड्यन मन्त्री योगेश भट्टराईले कुनै पनि पर्यटन व्यवसायीले श्रमिकहरूलाई कामबाट निकाल्न नपाउने बताएका छन्।</p>
<p>कोभिड-१९ को रोकथामका लागि लकडाउन लागू गरिएपछि होटल संघ नेपाल (हान)ले होटल बन्द गर्ने र कर्मचारीलाई केही प्रतिशत रकम पारिश्रमिक दिने निर्णय गरेपछि मन्त्री भट्टराईको उक्त भनाइ आएको हो। </p>
<p>“हामीले भनेका छौं, कुनै पनि व्यवसायीले श्रमिकहरूलाई अहिले बेदखल गर्न पाइँदैन। किनकि, उहाँहरूको सामाजिक सुरक्षा कोष पनि छ। होटल र अन्य कतिपय व्यवसायबाट प्राप्त गर्नुपर्ने विशेष सुविधाहरू पनि छन्,” भट्टराईले भने, ‘सरकारले पनि त्यसमा हेर्छ। त्यसैले अहिले श्रमिकहरूलाई बेदखल गर्ने कुरा गलत हो। त्यसो गर्न पाइँदैन।”</p>
<p>सरकारले आफ्ना केही आर्थिक प्याकेज पनि उपलब्ध गराउने उनले बताए। कोरोना भाइरसबाट परेको प्रभाव कम गर्न व्यवसायी र श्रमिकको हितमा केही पुनःस्थापना प्याकेज अगाडि सार्ने सोचका साथ मन्त्रालय अगाडि बढेको उनले बताए।</p>
<p>मन्त्रालयले व्यवसाय पुनः सञ्‍चालनमा ल्याउन बिनाधितो सहुलियत दरको कर्जा उपलब्ध गराउने, पुरानो ऋणको पुनर्तालिकीकरण गर्ने, भ्याट तथा ट्याक्समा छुट दिनेलगायत विषयमा सहयोग गर्ने मन्त्री भट्टराईले बताए।</p>
प्रतिक्रिया दिनुहोस्
.jpg)
