कपनमा कम तौलको ग्यास सिलिन्डर बेच्ने पक्राउ, तीन वर्ष कैद र जरिवाना मागदाबीसहित मुद्दाको तयारी
<p>काठमाडौं। महानगरीय प्रहरी वृत्त बौद्ध र प्रहरी प्रभाग कपनको संयुक्त टोलीले सिलिन्डरमा कम तौल ग्यास राखी बिक्री गर्ने एक व्यपारीलाई पक्राउ गरेको छ ।</p>
<p>प्रत्येक ग्यासको सिलिन्डरमा एकदेखि ६ किलोसम्म ग्यास कम राखेर नक्कली सिल गरी कालोबजारी गर्ने कपनको राइनो एडियस इन्टरप्राइजेज नामक ग्यास डिपोका सञ्चालक अमितकुमार श्रेष्ठलाई आज प्रहरीले पक्राउ गरेको हो ।</p>
<p>खरीद गरेर घर लगेको ग्यास कम तौल भेटिएपछि उपभोक्ताले कालोबजारीको आशङ्का गरी प्रहरीलाई खबर गरेका थिए ।</p>
<p>प्रहरी र गुणस्तर तथा नापतौल विभागको संयुक्त टोलीले खानतलासी गर्दा सिद्धार्थ ग्यास ४७ र गीता ग्यास २८ गरी जम्मा ७५ वटा ग्यासको सिलिन्डर बरामद गरेको थियो ।</p>
<p>बरामद भएका ७५ वटै ग्यासको सिलिन्डर मापदण्ड विपरीत कम तौल भएको र नक्कली सिल लगाइएको अवस्थामा फेला परेको बौद्धका प्रहरी नायब उपरीक्षक नवीन कार्कीले बताए।</p>
<p>बरामद ग्यासको सिलिन्डरसहित सञ्चालक श्रेष्ठलाई थप अनुसन्धान तथा कारवाहीका लागि गुणस्तर तथा नापतौल विभाग माछापोखरीमा पठाइएको छ।</p>
<p>विभागका महानिर्देशक विश्वबाबु पुढासैनीले सञ्चालकले ठगी गरेको पाइएकोले स्ट्यान्डर्ड नाप र तौल ऐन, २०२५ अनुसार तीन वर्ष कैद र ३० हजार मागदाबी गर्दै अदालतमा मुद्दा दायर गरिने जानकारी दिए।</p>
<p>प्रहरीका अनुसार सञ्चालक श्रेष्ठले कम तौलमा बिक्री वितरण गरेको बताउँदै यसअघि १०० थानभन्दा बढी कम तौलका ग्यासको सिलिन्डर बिक्री गरेको स्वीकार गरेका छन् ।</p>
<p>प्रहरीले घटनास्थलबाट कम तौलको ग्यास सिलिन्डरसहित ग्यास निकाल्न प्रयोग हुने फलामको पाइप, नक्कली सिलहरु बरामद गरेको थियो । <em>रासस</em></p>
प्रतिक्रिया दिनुहोस्
.jpg)
