Others

गृहपृष्ठ

'हट स्पट' वीरगञ्‍ज, नेपालगञ्‍ज र उदयपुरमा नमूना संकलन गर्न सेनासहितको टोली परिचालन काठमाडौं। स्वास्थ्य तथा जनसंख्या मन्त्रालयले अहिले कोरोना संक्रमित फेला परेका संख्याको आधारमा जोखिम र संवेदनशील देखिएका क्षेत्रमा नमूना संकलन गर्न विशेष टोली परिचालन गरेको छ। मन्त्रालयका प्रवक्ता डा. विकास देवकोटाले सबैभन्दा बढी संक्रमित देखिएको उदयपुर, वीरगञ्&zwj;ज र नेपालगञ्&zwj;ज 'हट स्पट' मा नमूना संकलन गर्न टोली परिचालन गरिएको जानकारी दिए। इपिडिमियोलोजी तथा रोग नियन्त्रण महाशाखाको नेतृत्वमा नेपाली सेनासहितको टोली स्वास्थ्य मन्त्रालयले तीनवटै स्थानमा पठाएको प्रवक्ता देवकोटाले जानकारी दिए। उनका अनुसार त्यहाँ खटिएको टोलीले उदयपुरबाट पाँचसय, वीरगञ्&zwj;जबाट एकहजार र नेपालगञ्जबाट एकहजार नमूना संकलन गरेर ल्याउने छ। मन्त्रालयका अनुसार संक्रमितको संख्या धेरै देखिएपछि अहिले संक्रमित पुष्टि भएका व्यक्तिहरुको परिवारका सदस्य, उनीहरुको सम्पर्कमा रहेका व्यक्तिहरु लगायत शंकास्पद मानिसहरूको नमूना संकलन गरिने छ। पर्साको वीरगञ्&zwj;ज महानगरपालिका–३ छपकैयामा हिजो एकै दिन २ महिने शिशुसहित १७ जनामा संक्रमण पुष्टि भएको थियो। त्यस्तै केही दिनअघि बाँकेको नेपालगञ्&zwj;ज उपमहानगरपालिकामा १५ जना एकैदिन संक्रमित फेला परेका थिए। स्वास्थ्य तथा जनसंख्या मन्त्रालयका अनुसार अहिलेसम्म नेपालमा संक्रमितको संख्या ९९ पुगेको छ। प्रदेश १ मा ३१, प्रदेश २ मा ३०, बाग्मती प्रदेशमा ७, गण्डकी प्रदेशमा २, प्रदेश ५ मा २४, सुदूरपश्चिम प्रदेशमा ५ जना संक्रमित फेला परेका छन्। हालसम्म कर्णाली प्रदेशमा भने संक्रमण देखिएको छैन। अहिले नेपालगञ्जमा २३, रुपन्देहीमा एक, धनगढीमा एका, भरतपुरमा एक, वीरगञ्&zwj;जमा २६, विराटनगरमा २५ जना गरेर ७७ जनाको आइसोलेसनमा राखेर उपचार भइरहेको छ। निको भएका २२ जनामध्ये ३ जनामा पुनः स्वास्थ्य समस्या देखिएपछि अस्पताल भर्ना गरिएको छ। ती मध्ये एकजना पाटन अस्पताल र दुईजनाको नारायणी अस्पतालमा उपचार भइरहेको मन्त्रालयले जनाएको छ। देशभर हालसम्म पीसीआर विधिबाट १४ हजार ५०९ नमूना परीक्षण गरिएको छ। त्यस्तै आरडीटी किटबाट ५४ हजार ९३ नमूना परीक्षण गरिएका छन्। क्वारेन्टाइनमा आजसम्म १७ हजार ३७२ जना रहेका छन्। मन्त्रालयले क्वारेन्टाइनमा बस्ने मानिसहरुलाई व्यक्तिगत सरसफाइमा ध्यान दिन, साबुन पानीले हात धुने, मास्क प्रयोग गर्ने, सूचनाका लागि स्वास्थ्य तथा जनसंख्याका मन्त्रालयका सूचना हेर्न अनुरोध गरेको छ।