यस्तो छ भोलि बस्ने प्रतिनिधि सभा बैठकको सम्भावित कार्यसूची
<p>काठमाडौं। भोलि दिँसो ४ बजे तय गरिएको संघीय संसद्को छैठौं अधिवेशनअन्तर्गतको प्रतिनिधि सभाको पहिलो बैठकको सम्भावित कार्यसूची तय गरिएको छ।</p>
<p>भोलिको बैठकमा प्रधानमन्त्री केपी शर्मा ओलीले ‘संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशाेधन) अध्यादेश, २०७७’ पेश गर्नेछन्। </p>
<p>त्यसपछि गृहमन्त्री रामबहादुर थापाले ‘राजनीतिक दल सम्बन्धी (दोस्रो संशोधन) अध्यादेश, २०७७’ पेश गर्नेछन्। </p>
<p>त्यपछि कानूनमन्त्री डा. शिवमाया तुम्बाहाङ्फेले राष्‍ट्रपतिद्वारा जारी '<a href="https://dekhapadhi.com/news/11386" target="_blank">केही अध्यादेश खारेज गरी नेपाल ऐनको साविकको व्यवस्था जगाउने अध्यादेश</a>, २०७७' प्रस्तुत गर्नेछिन्।</p>
<p>यो अध्यादेशले 'संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) अध्यादेश, २०७७' र 'राजनीतिक दलसम्बन्धी (दोस्रो संशोधन) अध्यादेश, २०७७' खारेज गरेको छ।</p>
<p>संघीय संसद सचिवालयका अनुसार त्यसबाहेक सभामुख अग्निप्रसाद सापकोटाले अधिवेशन आव्हानसम्बन्धी राष्‍ट्रपतिबाट प्राप्त पत्र पढेर सुनाउने, अधिवेशन शुरू भएको अवसरमा संसदीय दलका नेताहरूले मन्तव्य राख्‍ने पनि कार्यसूची छ। </p>
<p>यस्तै, प्रतिनिधि सभा नियमावली, को नियम १० को उपनियम (१) बमोजिम अध्यक्षता गर्ने सदस्यहरूको मनोनयन समेत गर्नेछन्। </p>
<p>बैठकमा ‘काठमाडाैं उपत्यका सार्वजनिक यातायात (व्यवस्थापन) प्राधिकरण विधेयक, २०७५ र ‘पारमाणविक विधेयक, २०७६’ का सम्बन्धमा राष्ट्रिय सभाबाट प्राप्त सन्देशसहितको विधेयक टेबुल गरिनेछ। </p>
<p>बैठकमा पहिलो संविधान सभा सदस्य प्रा. डा. विश्‍वनाथ प्रसाद अग्रवालको निधनप्रति शोक प्रस्ताव प्रस्‍तुत गरिने सम्भावित कार्यसूची छ। </p>
प्रतिक्रिया दिनुहोस्
.jpg)
