किट अभावमा कोभिड-१९ परीक्षण ठप्प
<p>कैलाली। किटको मौज्दात सकिएपछि सुदूरपश्चिममा कोरोना परीक्षण ठप्प भएको छ।</p>
<p>धनगढीको पशु अन्वेषण प्रयोगशालामा स्थापना गरिएको आरटी-पीसीआर मेसिनमार्फत कोरोना परीक्षण हुँदै आएको थियो। तर, किट सकिएपछि हिजो पनि पनि नमूना परीक्षण हुन सकेन।</p>
<p>बुधवार जम्मा चार जनाको कोरोना परीक्षण भएको थियो। किट अभावकै कारण चार दिनअघि विभिन्न जिल्लाबाट संकलन गरिएका ५५ जनाको थ्रोट स्वाबको नमूना अलपत्र परेका छन्।</p>
<p>पीसीआर विधिबाट कोरोना परीक्षण गर्दा पीसीआर किट र आरएनए एक्पेक्सन किट आवश्यक हुन्छ। पीसीआर किटको मौज्दात भए पनि आरएनए एक्पेक्सन किट सकिएपछि परीक्षण बन्द भएको प्रयोगशालाले जनाएको छ।</p>
<p>किटको अभाव भएपछि सेती प्रादेशिक अस्पतालबाट निको भएर घर फर्केकाहरूको समेत पुनः परीक्षण गर्न सकिएको छैन। किट अभावकै कारण नमूना संकलन बन्द गरिएको छ।</p>
<p>प्रदेशको सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले पनि किटको मौज्दात सकिएको बताउँदै आज संघीय सरकारले पठाउने जानकारी आएको बताए।</p>
<p>यसअघि सुदूरपश्चिममा दुई हजार नौ सय २३ जनाको पीसीआर र १४ हजार ६ सय १६ जनाको आरडीटी परीक्षण भएको छ। </p>
<p>प्रदेशमा पाँचजना कोरोना भाइरस संक्रमित देखिएकामा चारजना निको भएर घर फर्किसकेका छन् भने एकजनाको सेती प्रादेशिक अस्पताल धनगढीमा उपचार चलिरहेको छ।</p>
प्रतिक्रिया दिनुहोस्
.jpg)
