मुम्बईको एउटै जेलमा १०३ जनामा कोरोना भाइरस संक्रमण
<p>मुम्बई। भारतको आर्थिक राजधानी मुम्बईको एउटै जेलमा एक सय तीनजनामा कोभिड-१९ पोजिटिभ पाइएको छ।</p>
<p>मुम्बईको सबैभन्दा पुरानो आर्थर रोड जेलमा ७७ कैदी र २६ जना कर्मचारीमा कोरोना भाइरसको संक्रमण देखिएको हो। जेलको ठ्याक्कै सामुन्‍ने रहेको कस्तुरबा अस्पताललाई कोभिड-१९ का लागि नोडल अस्पताल बनाइएको छ।</p>
<p>यस जेलमा करिब दुई हजार कैदी छन्। जेलको क्षमता भने आठ सय कैदीको मात्र हो। सोही कारण यस जेलमा कैदीहरूबीच भौतिक दूरी कायम गर्न असम्भव रहेको स्थानीय सञ्‍चारमाध्यमहरूले जनाएका छन्।</p>
<p>‘मनी लन्डरिङ’ मुद्दामा कारागार सजाय सुनाइएका 'यस बैंक'का संस्थापक राणा कपुर पनि हाल सोही जेलमा छन्।</p>
<p>कोरोना भाइरसको संक्रमणमा परेका कैदीलाई मुम्बईको जीटी र जर्ज गरी दुईवटा अस्पतालमा भर्ना गरिएको छ। कर्मचारीलाई अलग्गै अस्पतालमा पुर्‍याइएको छ।</p>
<p>गत बुधबार ४५ वर्षका एक कैदीको कोभिड-१९ रिपोर्ट पोजिटिभ आएको थियो। त्यसयता दुई सयभन्दा बढीको स्वाब नमूना परीक्षण गरिएको छ।</p>
प्रतिक्रिया दिनुहोस्
.jpg)
