संसद्मा देउवाको माग- 'महामारी प्रभावितका लागि राहत घोषणा गर'
<p>काठमाडौं। प्रमुख प्रतिपक्ष दल नेपाली कांग्रेसका सभापति शेरबहादुर देउवाले कोभिड-१९ को संकटबाट प्रभावित भएकाहरूलाई राहत दिन नसकेको बताएका छन्।</p>
<p>आजदेखि शुरू भएको संसद्को बजेट अधिवेशनमा बोल्दै सभापति देउवाले सरकारले प्रभावितहरूका लागि उचित प्याकेज ल्याउन नसकेको बताएका हुन्।</p>
<p>उनले तत्कालै प्रभावितहरूका लागि राहत प्याकेजको कार्यक्रम ल्याउन माग गरेका छन्।</p>
<p>यस्तै समयमा स्वास्थ्य सामाग्री खरिद नगर्नु, खरिद प्रक्रिया पनि पारदर्शी नभएकाे भन्दै दोषीहरूलाई पदमुक्त गरेर अनुसन्धान गर्न सरकारको ध्यानाकर्षण गराएका छन्।</p>
<p>कोभिड-१९ को संक्रमणका बेला दुईवटा अध्यादेश ल्याएर अलोकतान्त्रिक काम गरेकाे देउवाकाे भनाइ छ।</p>
<p>उनले विश्वव्यापी महामारीबाट विश्वभर मृत्यु भएकाहरूलाई श्रद्धाञ्जलीसमेत व्यक्त गरे। साथै नेपालमा रहेका संक्रमित र विश्वका विभिन्न ठाउँमा रहेका नागरिकको शीघ्र स्वास्थ्यलाभको कामनासमेत गरे</p>
<p>देउवाले पर्याप्त स्वास्थ्य उपकरणको अभावमा फ्रन्टलाइनमा रहेर काम गर्ने स्वास्थ्यकर्मी, सुरक्षाकर्मी, सञ्चारकर्मीलगायतको उच्च मूल्यांकनका साथ प्रशंसा गरेका छन्।</p>
<p>कोभिड-१९ नियन्त्रण रोकथामका लागि पार्टीले काम गरिरहेको उनकाे भनाइ छ।</p>
<p>उनले सरकारलाई कोभिड-१९ मा पूर्ण समर्थन रहने बताएका छन्।</p>
<p>उनले भ्रष्टाचार, आर्थिक अनियमिततामा आँखा चिम्लन नसकिने बताए। कोभिड-१९ को संक्रमण भइरहेका बेला सरकार फुटाउने काम गरेको आरोप पनि उनले लगाए।</p>
<p>उनले सांसद् अपहरण गर्नेलगायतको काम भएको भन्दै संलग्नलाई कानूनी दायरामा ल्याएर कारबाही गर्न माग पनि गरेका छन्।</p>
<p>सरकारले परीक्षण दायरा बढाउन नसकेको भन्दै उनले दायरा बढाउन आवश्यक रहेको बताए। विदेशमा बिचल्लीमा परेका नागरिकको उद्धारको कुनै कार्यक्रम नल्याइएको उनको आरोप छ।</p>
<p>अप्ठ्यारोमा परेका नागरिकको उद्धार गर्नु सरकारको दायित्व भएको भन्दै यसबारे तत्काल पहल थाल्न उनले सरकारसँग माग गरेका छन्।</p>
प्रतिक्रिया दिनुहोस्
.jpg)
