विश्व अर्थव्यवस्था सन् १९३० को जस्तै संकटमाः आईएमएफ
<p>वासिङ्टन। अन्तर्राष्‍ट्रिय मुद्रा कोष (आईएमएफ)ले विश्‍व अर्थव्यवस्था सन् १९३० कै जस्तो संकटमा परेको बताएको छ। </p>
<p>“सन् १९३० को महामन्दीपछि विश्‍वको अर्थतन्त्रमा सबैभन्दा खराब गिरावट आउँदैछ,” आईएमएफकी प्रबन्ध निर्देशक क्रिस्टालिना जर्जिभाले भनिन्, “कोरोना भाइरसले संसारलाई ऐतिहासिक संकटमा पार्दैछ।”</p>
<p>कोभिड-१९ को महामारी लामो समय बाँकी रह्यो भने उत्पन्‍न हुने संकटलाई सम्हाल्ने विषय सरकार र केन्द्रीय बैंकहरूका लागि असली परीक्षा हुने जर्जिभाको भनाइ छ।</p>
<p>अमेरिका र चीनबीच जारी ‘ट्रेड वार’प्रति आपत्ति जनाउँदै उनले यसबाट कोभिड-१९ को महामारीबाट अर्थव्यवस्थालाई बचाउने प्रयास कमजोर हुने बताइन्।</p>
<p>समाचार एजेन्सी रोयटर्सका अनुसार हालै अमेरिकी राष्‍ट्रपति डोनाल्ड ट्रम्पले कोभिड-१९ को महामारी रोक्न नसकेको दाबी गर्दै अब नयाँ प्रकारको कर लगाएर चीनलाई त्यसको सजाय दिने बताएका थिए। अमेरिका-चीन ट्रेड डिलको पहिलो चरण अन्त्य गर्न सक्ने संकेत पनि उनले दिएका थिए।</p>
<p>एक भर्चुअल बैठकलाई सम्बोधन गर्दै जर्जिभाले भनिन्, “सन् २०२० मा विश्‍व अर्थतन्त्रमा तीन प्रतिशतको कमी आउने अनुमान थियो तर कतिपय मुलुकमा त्यसभन्दा कमजोर अवस्था देखिएको छ।”</p>
प्रतिक्रिया दिनुहोस्
.jpg)
