Others

गृहपृष्ठ

उपप्रधानमन्त्री पोखरेल भन्छन्- ‘कोरोना नियन्त्रणमा सबैको इमान्दार प्रयासको खाँचो छ’ काठमाडौं। कोभिड–१९ क्राइसिस् मेनेजमेन्ट सेन्टर (सीसीएमसी)को औपचारिक एप कोभिडएनपीको शुरूआत गरिएको छ।  उपप्रधानमन्त्री एवं सीसीएमसीका संयोजक ईश्वर पोखरेलले कोभिड– १९ महामारी रोकथाम, नियन्त्रण र प्रतिकार्यका लागि छाउनीमा स्थापना गरिएको सीसीएमसी सञ्चालन केन्द्रमा आज आयोजित समारोहमा एपको डाउनलोड गरी उदघाटन गरे।  सम्भावित बिरामीको पहिचान गरी समयमा नै द्रुत स्वास्थ्य परामर्शलगायत थप उपचारको व्यवस्थालाई सहज बनाउने उद्देश्यले उक्त एप प्रयोगमा ल्याइएको हो। जो कसैले पनि डाउनलोड गरी प्रयोग गर्नसक्ने उक्त एपबाट कोभिड– १९ रोगका लक्षण, सङ्क्रमणबाट जोगिन अपनाउनुपर्ने सतर्कता, स्वास्थ्य परीक्षणलगायतका विषयमा विस्तृत जानकारी प्राप्त हुनेछ।    प्रयोग गर्ने व्यक्तिलाई सोधिएको प्रश्नका आधारमा प्राप्त उत्तरको मूल्याङ्कन गरी प्रयोगकर्तालाई हरियो, पहेँलो र रातो गरी तीन श्रेणीमा विभाजन गरी आवश्यकताअनुसार पत्ता लगाउन सक्ने व्यवस्था गरिएको सैनिक जनसम्पर्क तथा सूचना निर्देशनालयले जनाएको छ।      कार्यक्रममा कोभिड– १९ को विश्वव्यापी महामारी र नेपालको हालको अवस्था, त्यसको रोकथाम, नियन्त्रण र उपचारको व्यवस्थाका सम्बन्धमा भएका मुख्य कार्य, भावी रणनीति तथा कार्यनीतिबारे जानकारी दिइयो।      समारोहमा उपप्रधानमन्त्री पोखरेलले महामारी रोकथाम, नियन्त्रण र प्रतिकार्यलाई थप प्रभावकारी बनाउँदै परिस्थितिलाई सहज बनाउने कार्यतर्फ सबैको इमान्दार प्रयासको खाँचो औँल्याए। उनले भने, “कोभिड– १९ बारे सूचना दिन बनाइएका एप आम नागरिकले सरल ढङ्गबाट थाहा पाउने, बुझ्ने र प्रयोग गर्नसक्ने हुनुपर्छ, गलत सूचना प्रवाह हुन नदिनेतर्फ सबै होसियार रहनुपर्छ।”    कोभिडबारे यथार्थ जानकारी जनतालाई दिन जरुरी रहेको बताउँदै उपप्रधानमन्त्री पोखरेलले हरेक व्यक्तिले जानकारी होस् भन्ने हेतुले तयार गरिएको एपको प्रयोग गर्न, सही सूचना प्राप्त र प्रवाह गर्न सम्पूर्ण नागरिकलाई आह्वान गरे।  उक्त एपमार्फत् कोरोनासम्बन्धी आवश्यक जानकारी लिइ रोग नियन्त्रण र रोकथाममा सहयोग पु¥याउन आम नागरिकलाई अनुरोध गरिएको छ। उक्त एपमा राखिएका तथ्य तथ्याङ्क राष्ट्रिय सूचना केन्द्रमा समेत रहनेछन्। कोभिड– १९ का सम्बन्धमा तथ्यपरक र एकीकृत तथ्याङ्क राख्न एप फलदायी हुने विश्वास लिइएको छ। प्रधानमन्त्री तथा मन्त्रिपरिषद् कार्यालयका सचिव नारायणप्रसाद बिडारीले कोभिड– १९ सम्बन्धी जानकारी र सूचना एकीकृत रूपमा प्राप्त गर्न सकियोस् भन्ने हेतुले तयार गरिएको एपबाट प्रयोगमा सहज र सरल गराउने तथा दुरूपयोग नहोस् भन्नेमा उच्च सतर्कता हुन आवश्यक रहेको बताए। रासस