निजगढ विमानस्थलको पहुँच सडकका लागि चार हजारभन्दा बढी रुख काटिने
<p>काठमाडौं। बारामा प्रस्तावित निजगढ अन्तर्राष्ट्रिय विमानस्थलको निर्माण क्षेत्रको चारकिल्ला परिसरमा पहुँच सडक निर्माणका लागि चार हजार २३२ रुख काटिने भएको छ। </p>
<p>राष्ट्रिय गौरवको आयोजनाको रूपमा रहेको निजगढ विमानस्थल निर्माणमा अन्तरनिकाय समन्वयसम्बन्धी उच्चस्तरीय सहजीकरण समितिको हिजो, २८ वैशाखमा बसेको बैठकले विमानस्थल परिसर सडकका लागि तोकिएको क्षेत्रमा रुख कटान गर्नुपर्ने आँकडा निकालेको हो ।</p>
<p>समितिले रुख कटानको प्रक्रिया अगाडि बढाउनेसमेत निर्णय भएको बैठकपछि जारी गरिएको विज्ञप्तिमा उल्लेख छ।</p>
<p>रुख कटान प्रक्रियाअन्तर्गत रुख कटानको स्वीकृतिका लागि वन तथा वातावरण मन्त्रालयले यथाशीघ्र नेपाल सरकार (मन्त्रिपरिषद्) समक्ष प्रस्ताव पेश गर्ने निर्णय समितिले गरेको छ ।</p>
<p>निजगढ विमानस्थल आयोजना निर्माणका लागि अन्तरनिकाय समन्वय, सहजीकरण एवं आइपरेका समस्या समाधान गर्न निरन्तर क्रियाशील रहने गरी संस्कृति, पर्यटन तथा नागरिक उड्डयनमन्त्री संयोजक रहने गरी उच्चस्तरीय सहजीकरण समिति बनाइएको छ।</p>
<p>समितिले विमानस्थल निर्माण क्षेत्रभित्रका रुख तथा पोलको लगत संकलन कार्यसमेत तत्काल अघि बढाउने निर्णय गरेको छ।</p>
<p>समितिको चौथो बैठकले गत २०७६ माघ २ मा बस्ती स्थानान्तरण सम्बन्धमा निर्णय गर्न कार्यदल गठन गरेको थियो।</p>
<p>विमानस्थल निर्माण गर्न लगानी बोर्डले निश्चित समयसीमा तोकी जुरिच इन्टरनेशनलसँग सार्वजनिक निजी साझेदारी (पिपिपी) मोडेलको प्रस्ताव माग गर्ने र सम्झौता प्रक्रिया पूरा गर्ने निर्णय भएको मन्त्रालयले जनाएको छ।</p>
<p>समितिले प्राधिकरणबाट निजगढ विमानस्थलको गुरुयोजना निर्माणको खरीद सम्झौता प्रक्रियासमेत छिटो सक्न निर्देशन दिएको छ। <em>रासस</em></p>
प्रतिक्रिया दिनुहोस्
.jpg)
