कोभिड-१९ पोजिटिभ देखिएका हाइटीका नागरिकलाई स्वदेश फर्काउँदै अमेरिका
<p>वासिङ्टन। कोभिड-१९ पोजिटिभ देखिएका हाइटीका करिब एक सय नागरिकलाई आज स्वदेश फर्काइँदैछ। उनीहरूको पुनः परीक्षण पनि गरिएको छैन।</p>
<p>तीमध्ये पाँचजनामा हालै कोरोना भाइरसको संक्रमण देखिएको छ। अमेरिकास्थित अधिकारवादी संघसंस्थाले त्यस कदमको विरोध गरिरहेको अलजजिराले उल्लेख गरेको छ।</p>
<p>डिपोर्टेसनको प्रक्रियामा रहेका स्टेफनी एटिनीले दिएको जानकारीअनुसार पुनः परीक्षणका लागि सरकारले कुनै चासो दिएको छैन।</p>
<p>बोस्टोनस्थित इन्स्टिच्युट फर जस्टिस एन्ड डेमोक्रेसी इन हाइटीले आफ्नो मुलुकका नागरिकलाई अमेरिकाले जबर्जस्ती स्वदेश फर्काउँदै गरेको पुष्‍टि गर्‍यो।</p>
<p>“अमेरिकाले किन यसो गरिरहेको छ भन्ने बुझ्‍न सकिएन,” स्टेफनीले भने, “अमेरिकामै जन्मेर कहिल्यै हाइटी नटेकेका मानिसलाई किन डिपोर्ट गर्न लागिएको हो ?”</p>
<p>उनीहरूलाई अमेरिकाबाट निकाला गर्नु कोरोना भाइरसको प्रसारविरुद्ध तयार भएको अन्तर्राष्‍ट्रिय स्वास्थ्य गाइडलाइनको ठाडो उल्लंघन भएको अधिकारवादी संघसंस्थाको भनाइ छ।</p>
<p>हाइटीको राष्‍ट्रिय प्रयोगशालाका निर्देशक डा. ज्याक्स बोन्सीले पनि अमेरिका सरकारको उक्त निर्णयले पूरै हाइटीलाई जोखिममा पारिदिएको बताएका छन्।</p>
प्रतिक्रिया दिनुहोस्
.jpg)
