साना किसानको माग- 'कृषि उत्पादन बजारसम्म ल्याएर बिक्री गर्न पाउँ'
<p>काठमाडौं। किसानले उत्पादन गरेको तरकारी बजारसम्म ल्याएर बिक्री गर्न पाउने वातावरण बनाइदिन तरकारी तथा फलफूलका अगुवा कृषकहरूले माग गरेका छन्।</p>
<p>प्रतिनिधि सभाअन्तर्गतको अर्थ समितिको बैठकमा साना किसान विकास लघुवित्त वित्तीय संस्थाका अध्यक्ष खेमबहादुर पाठकले किसानले उत्पादन गरेको वस्तु कालिमाटी तरकारी बजारमा विक्री गर्न नसकेको गुनासो गरे।</p>
<p>"तरकारी बजारमा ८ बजे भित्र बिक्री गर्न नसके किसानले आफ्नो तरकारी घर फिर्ता गर्नुपर्ने अवस्था छ। त्यो बजार त ४/५ सय मान्छेले कब्जा गरेर बसेका छन्। हामी कोही छिर्न पाउँदैनौं’, पाठकले भने। </p>
<p>तरकारी तथा फलफूल संघका अध्यक्ष विनोद पराजुलीले कालिमाटी तरकारी बजारमा किसानहरूले सञ्‍चालन गरेको सहकारीको पहुँच नभएको बताए।</p>
<p>आफूहरूले ९ प्रतिशत स्टल पाउने सहमति भएपनि त्यहिंको व्यापारीहरूको सहकारीको कब्जा रहेको उनको भनाइ छ।</p>
<p>राष्ट्रिय सहकारी महासंघका अध्यक्ष मीनराज कँडेलले लकडाउनको असर सबै कृषि क्षेत्रमा परेको बताए।</p>
<p>दुग्ध सहकारी अभियान मार्फत देशभर उत्पादन हुने ६ लाख लिटर दूधमध्ये करीब ३ लाख लिटर दूध विक्री नहुँदा दैनिक एक करोड ५० लाख रूपैयाँ बराबरको नोक्सानी भइराखेको उनले बताए। </p>
<p>"यस्तै पशुपन्छीलाई खुवाउने आहार र दानको ढुवानीमा समस्या भएको छ। कृषि उत्पादन विक्री नहुँदा बारीमै कुहिएको छ। लकडाउनले करीब ६ लाख केजी हरियो चिया टिप्न नपाएर खेर गइरहेको छ", कँडेलले भने।</p>
<p>राष्ट्रिय सहकारी बैंकका अध्यक्ष केबी उप्रेतिले सहकारी मार्फत कृषि उत्पादन बढाउने र सहज बजारको व्यवस्था गर्न बजेटको प्राथमिकता दिनुपर्ने सुझाव राखेका छन्।</p>
प्रतिक्रिया दिनुहोस्
.jpg)
