राज्यव्यवस्था समितिको निर्देशन- 'परीक्षण बढाऊ, लकडाउन खुकुलो बनाऊ'
<p>काठमाडौं। प्रतिनिधि सभा अन्तर्गतको राज्य व्यवस्था तथा सुशासन समितिले कोरोना भाइरस रोकथाम तथा नियन्त्रणका लागि पीसीआर प्रविधिबाट गरिने परीक्षणलाई वृद्धि गर्न र लकडाउनलाई क्रमश खुकुलो पार्न सरकारलाई निर्देशन दिएको छ।</p>
<p>आजको बैठकमा समितिले स्थानीय स्तरमा निर्माण गरिएका क्वारेन्टाइनलाई मापदण्ड अनुसार बनाउनुपर्ने, आइसोलेसन बेडहरु पर्याप्त मात्रामा निर्माण गर्नुपर्नेमा जोड दिएको छ।</p>
<p>त्यस्तै किसानहरूलाई मल तथा बीउबिजन उपलब्ध गराउनु पर्ने र उत्पादित वस्तु बजार सम्म पुर्‍याउन सहज बनाउन समेत समितिको निर्देशन छ।</p>
<p>विदेशमा अलपत्र परेका कामदार र भारतसँगको सीमावर्ती क्षेत्रमा बसेका मानिसहरुलाई संक्रमण नियन्त्रण सम्बन्धी विश्वव्यापी मापदण्ड अनुसार व्यवस्थित रुपमा घर फर्कने व्यवस्था मिलाउन निर्देशन दिइएको समितिकी सभापति शशी श्रेष्‍ठले बताइन्।</p>
<p>विदेशमा रहेका नेपालीहरूको समस्या समाधानका लागि प्रधानमन्त्री स्तरबाटै सम्बन्धित देशमा कुरा भइसकेको र कुनै समस्या भए सम्बन्धित देशले नै समाधान गर्ने उपप्रधानमन्त्री एवं कोरोना भाइरस नियन्त्रण तथा रोकथाम उच्चस्तरीय समन्वय समितिका संयोजक ईश्वर पोखरेलले जानकारी गराएका छन्।</p>
<p>गृहमन्त्री रामबहादुर थापाले भारतीय सीमा पारी करीब २१ सय नेपालीहरू क्वारेन्टाइनमा रहेको बताए।</p>
<p>स्वास्थ्यमन्त्री भानुभक्त ढकालले सरकारसँग उपलब्ध भएका परीक्षण किटहरुको आधारमा कन्ट्याक ट्रेसिङको मापदण्ड बनाई परीक्षण गरिएको बताए।</p>
<p>पछिल्लो केही दिनयता पीसीआर प्रविधिबाट गरीने परीक्षणलाई पनि बढाइएको मन्त्री ढकालले जानकारी गराएका छन्।</p>
प्रतिक्रिया दिनुहोस्
.jpg)
