कोभिड-१९ : इन्डोनेसियामा ‘राइस एटीएम’
<p>जाकार्ता। कोरोना भाइरसको संक्रमणबाट जोगिन विश्‍वभरका मानिस भौतिक दूरीमा बसेका छन्। तर, अत्यावश्यक वस्तुको खरिद-बिक्रीमा त्यस्तो भौतिक दूरी उल्लंघन पनि हुँदै आएको छ।</p>
<p>इन्डोनेसियामा भने मानिसबीच भौतिक दूरी कायम राख्‍न मेसिनको सहारा लिइन थालेको छ। त्यो पनि ‘राइस एटीएम’मार्फत।</p>
<p>अलजजिराका अनुसार लकडाउन पालना गरेर घरभित्रै बसेका मानिसलाई चामल खरिदका लागि बजारमा भेन्डिङ मेसिनको व्यवस्थापन गरिएको हो। </p>
<p>भेन्डिङ मेसिनमा राम्रो गुणस्तरको चामल राखिएको छ। र, मानिसले म्याग्‍नेटिक कार्डको मद्दतबाट उक्त चामल आफ्नो झोलामा हाल्न सक्छन्।</p>
<p>जाकार्ताको बाहिरी क्षेत्रस्थित सैन्य शिविरका अधिकारी इब्राहिमका अनुसार दैनिक डेढ टन चामल भेन्डिङ मेसिनमा राख्‍ने गरिएको छ, जुन करिब एक हजार परिवारले खरिद गरेर लैजान्छन्।</p>
<p>सेनाले हरेक दिन यसरी नै मानिसलाई चामल पुर्‍याइरहेको छ। सप्ताहन्तमा पनि वितरण रोकिँदैन।</p>
<p>खासगरी, दैनिक ज्यालादारीमा जीवन निर्वाह गर्नेहरूका लागि भने सरकारले यस्तै भेन्डिङ मेसिनमार्फत निःशुल्क रासन उपलब्ध गराइरहेको छ। गरिबीको रेखामुनि रहेको जनसंख्या यस पाटोमा समेटिएको छ।</p>
प्रतिक्रिया दिनुहोस्
.jpg)
