आज भेटिएका सबै संक्रमित पुरुष, नेपालमा एकै दिन अहिलेसम्मकै उच्च संक्रमण
<p>काठमाडौं। नेपालमा आज एकै दिनमा अहिलेसम्मकै धेरै व्यक्तिमा कोरोना भाइरस संक्रमण भेटिएको छ।</p>
<p>स्वास्थ्य तथा जनसंख्या मन्त्रालयका अनुसार आज चार जिल्लामा गरेर ५७ जनामा कोरोना संक्रमण पुष्टि भएको हो।</p>
<p>संक्रमितमध्ये सबभन्दा धेरै पर्साका ३९ जना छन्। त्यसबाहेक रुपन्देहीमा ९, कपिलवस्तुमा ८ र बारामा एकजना फेला परेका छन्।</p>
<p>योसँगै अहिलेसम्म कोरोना भाइरस संक्रमित हुनेको संख्या १९१ पुगेको छ।</p>
<p>नेपालमा पहिलो कोरोना पोजिटिभ व्यक्ति भेटिएपछि दोस्रो संक्रमित भेटिन एक महीना लागेको थियो।</p>
<p>त्यसपछि एक वा दुई जनामा मात्र फाट्टफुट्ट संक्रमण पुष्टि भएको थियो।</p>
<p>उदयपुरमा एकै दिन ११ जनामा संक्रमित भेटिएपछि त्यसलाई नेपालगञ्‍जले उछिनेको थियो।</p>
<p>त्यहाँ एकै दिन १५ जनामा संक्रमण देखिएको थियो। त्यसपछि नेपालगञ्‍जलाई उछिनेर एकै दिन पर्सामा १७ जना कोभिड-१९ का बिरामी थपिएका थिए।</p>
<p>हिजो, २९ वैशाखमा २४ जनामा कोरोना संक्रमण पुष्टि भएको थियो।</p>
<p>आज भने त्यसको दोब्बरभन्दा पनि धेरैमा कोरोना संक्रमण पुष्टि भएको छ।</p>
<p>स्वास्थ्य मन्त्रालयका सहप्रवक्ता समीर अधिकारीका अनुसार आज संक्रमण पुष्टि भएका सबैजना पुरुष छन्। तर, उनीहरु सबैको उमेर भने खुलेको छैन।</p>
प्रतिक्रिया दिनुहोस्
.jpg)
