घरमा गोली राख्ने वडा अध्यक्ष धरौटीमा रिहा
<p>म्याग्दी। हातहतियार तथा खरखजनासम्बन्धी मुद्दामा प्रहरी हिरासतमा रहेका म्याग्दीको रघुगङ्गा गाउँपालिका-६ पाखापानीका वडा अध्यक्ष मनकुमार शेरपुजा धरौटीमा छुटेका छन्।</p>
<p>म्याग्दी जिल्ला अदालतका न्यायाधीश माधवेन्द्रराज रेग्मीको इजलासले शेरपुजालाई धरौटीमा छाड्न आदेश दिएका हुन्।</p>
<p>उनी दुई लाख ५० हजार रूपैयाँ धरौटी बुझाएर छुटेको म्याग्दी जिल्ला अदालतका श्रेस्तेदार खिलप्रसाद बुर्लाकोटीले बताए।</p>
<p> जिल्ला सरकारी वकील कार्यालयले शेरपुजाविरुद्ध सात वर्ष कैद र ७० हजार जरिवानाको मागदाबी गरेको थियो ।</p>
<p>अध्यक्ष शेरपुजाले आफूसँग गोली रहेको स्टाटस फेसबुकमा राखेपछि प्रहरीले घर खानतलासी गरेको थियो।</p>
<p>३० चैत २०७६ मा घरमा खानतलासी गर्दा प्रहरीले एक थान बाह्रबोरको गोली बरामद गरेको थियो ।</p>
<p>शेरपुजा २०७४ वैशाखको स्थानीय तह निर्वाचनमा नेपाली कांग्रेसबाट विजय भएका थिए।</p>
<p>फौजदारी अभियोग लागेकाले अदालतबाट अन्तिम फैसला नहुँदासम्म उनको पद निलम्बन हुने कानूनी व्यवस्था छ। <em>रासस</em></p>
प्रतिक्रिया दिनुहोस्
.jpg)
